大角嘴街坊價日式料理心思爆滿海鮮丼飯

[sig_post_pv label=””] 個人瀏覽過

一般人去日式料理店，分分鐘要幾百蚊埋單，但大角嘴有一間日式料理店，拍拖去食海鮮丼飯，兩個人埋單亦只係百幾蚊，如果加一板海膽亦唔使一百蚊，的確係街坊價嘅日式料理店，難怪小店多多嘅大角嘴會被稱為隱藏版美食之地。

小店門面唔大，室內呈長形，燈光昏暗，但乾淨企理，外面雖然毫不起眼，但入面略帶日式風格，大概有廿零卅個座位。菜式上刺身、壽司、丼飯，亦有燒物、小食等，包括拖羅、赤貝、海膽、油甘魚、吞拿魚、牡丹蝦等。

當中有12款海鮮丼飯，每一款都包含三文魚，然後可以按個人喜好揀選唔同配搭，套餐附湯、沙律，價錢由最平$58至最貴$98，睇落幾抵食。沙律配上芝麻醬，清新開胃；而湯並非味噌湯，而係豆腐紫菜湯，略有魚味，幾順口，比味噌湯係有鮮甜味。

丼飯飯量適中，米飯不過不失，三文魚、吞拿魚、油甘魚丼$78 每款都有兩片刺身，唔算厚切，但並非薄切，食材新鮮，屬正常水準，吞拿魚比較淡身，油甘魚則好肥美，油脂分佈平均；而三文魚、甜蝦、海膽丼$78 亦新鮮，甜蝦為有頭牡丹蝦，甚爽口鮮甜，海膽則入口即融，夠Creamy。

E.A.Tips﹕

(1) 留意18:00後晚市有加一服務費，午市就無加一。

(2) 套餐只有湯、沙律，汽水就要加$6。

(3) 外賣自取有9折優惠。

(4) 下午15:00後會落場，18:00再開門，而晚市經常滿座，早少少食會比較好。

(5) 食完嘢後，店員會遞上濕紙巾，方便消毒同抺手，非常細心。

(6) 一板馬糞海膽特價只需$98。