大角嘴街角星馬菜餐廳 大大塊厚切豬扒上枱就聞到香味

[sig_post_pv label=””] 個人瀏覽過

 

 

 

 

大角嘴小店多多,呢間星馬菜餐廳固然以肉骨茶、海南雞飯、叻沙、椰漿飯、三色奶茶為主,菜式水準不俗,值得拍拖兩個人去試試,但最特別嘅地方反而唔係食物,點解呢?碌到最尾話你知。

小店位於大全街,店內裝潢簡單,有少量新加坡風格裝飾,座位多,夜晚人流唔少,菜式為新加坡、馬來西亞菜,最出色嘅反而係厚切豬扒。招牌厚切豬扒叻沙連摻摻$64 以新加坡叻沙、摻摻配搭厚切豬扒,叻沙椰香味重,配料有魚蛋、豆卜、熟蛋、芽菜,由油麵、米粉混合嘅摻摻份量適中,叻沙湯底香料味比較多,無辛辣味,質感較稀,並非濃稠感,尚可掛湯,整體不過不失。

而厚切豬扒一定係推介,揭開蓋已經聞到陣陣豬扒煎炸香味,外賣豬扒都分成兩層,份量大概有手掌咁大塊。豬扒夠厚肉,表皮鬆脆,無炸粉感,內裏有鎖緊肉汁,肉質稔身,香口而唔油膩。

馬拉風味參巴魚扒配椰漿飯$65 內有厚肉嘅馬拉魚扒,魚肉唔太嫩滑,但就無骨,旁邊有青瓜、花生等點綴,增加爽脆、香脆口感。而椰漿飯就好出色,飯粒軟稔,有椰香味,加上表面一隻太陽蛋,外賣仍有蛋汁滲入飯內,撈飯一流。

三色奶茶好快會賣晒,無就咪有飲單色奶茶,凍奶茶比較似港式凍奶茶,而咸檸七$15 亦係港式飲品,存在於星馬菜餐廳有種Crossover感覺。



小編講吓嘢﹕

編輯認為小店最突出嘅地方並唔係菜式,而係店內嘅男侍應,佢絕對做足一個餐廳侍應嘅本份,有禮貌又有親切感,語氣、說話非常有趣,可以令繃著臉嘅香港人會心微笑,感覺好搞笑,呢啲真係香港人精神。呢位男士應該係可以15分鐘唔停口講嘢,而且係全無悶場嘅人,如果有最佳侍應選擇,呢位男侍應大概有資格打入頭三甲位置。


E.A.Tips﹕

(1) 小店位於大全街一角,由旺角行向君滙港方向就會見到,大全街位於中匯街小巴站前一個街口。

(2) 建議盡量選擇堂食,因為厚切豬扒的確好香口,外賣始終會減一分。

(3) 最好唔好太夜去食飯,部份菜式隨時會售罄。


星洲總廚

大角嘴大全街57號地下
12:00 – 22:00
3590 3326

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈大角嘴街角星馬菜餐廳 大大塊厚切豬扒上枱就聞到香味〉中有 1 則留言

留言功能已關閉。