[sig_post_pv label=””] 個人瀏覽過
講到寂寂無聞，E.A.Two一定榜上有名，名氣往往同時運、金錢有關係。而大角嘴滿佈豪宅、舊樓，附近食店林立，係醫肚勝地，而呢間街邊小店亦屬藉藉無名嘅泰國菜小店，據悉老闆娘為泰國人，其女兒亦於店內幫忙，所炮製嘅正宗泰國菜亦係拍拖情侶嘅好選擇！
小店座位只得12個，午餐亦只係幾款選擇，基本飯類有8款，包括海南雞飯、泰式金邊粉、泰式雞扒飯、香葉肉碎煎蛋飯等，一盒飯最貴$50埋單，換言之兩個人只需$100。另外，亦有8款小食可擇，包含冬蔭功、生菜包、青咖哩、木瓜沙律等，都係泰國菜主要菜式。
海南雞飯都分成3款，分別係唔同部位，海南雞髀飯$50 飯量充足，油飯幾有黃油香，雞肉量亦唔少，雞皮令身，入口爽彈，肉質嫩滑，雞肉全為無骨雞。泰式海南雞只有一款醬汁，帶酸辣味，略有鹹味，蘸雞好醒胃，而附送嘅冬瓜湯亦有鮮甜味。
至於香茅豬扒飯$43 配有泰式辣醬，醬汁酸甜中略帶辛辣味，豬扒本身有厚度，有香脆感，略嫌炸粉稍厚，而豬扒嘅香茅味唔太重，反而有幾分似港式豬扒飯。
E.A.Tips﹕
(1) 小店位於富多來商場2期地下，唔需要走入商場內。
(2) 每碟飯本身唔包飲品，要另外加錢，介乎$6至$10。
(3) 夜晚8點無堂食，只有外賣。
Top Thai Thai Food
大角嘴晏架街79號富多來商場2期地舖 
5403 2495
