中環半山藏薄荷綠摩羅廟 全港最古老清真寺被列一級歷史建築

[sig_post_pv label=””] 個人瀏覽過





中環心臟地帶竟然出現一座超靚嘅薄荷綠教堂?呢座建築物其實係一座被列為香港一級歷史建築嘅寺廟,拍拖兩個人可以去欣賞吓歷史建築,亦可以影吓相。

位於中環半山位置嘅些利街清真寺,英文叫Jamia Mosque,又被稱作「摩羅廟」,係目前全港最古老嘅清真寺。大閘為繡花門,穿過大閘即可見到以薄荷綠色為主調嘅寺廟,四處被茂密樹叢包圍,由外邊唔容易觀望到呢座神秘寺廟。尖塔塔頂、星月圖案非常搶眼,加上顏色吸睛,為典型伊斯蘭建築,被古物古蹟辦事處列作香港一級歷史建築,就連旁邊教徒住處(即棲留所)都被列作香港二級歷史建築。

些利街清真寺於1849年建成,於1870年擴建,由小石屋變成清真寺,亦被稱作回教清真禮拜總堂,內有彩色玻璃,亦有唔少回教徒崇拜或聚會,清真寺代表殖民地時期嘅穆斯林歷史。印度籍穆斯林係最初來港嘅少數族裔之一,為英國駐港印度軍隊,而寺廟曾收留唔少貧苦穆斯林,所以附近都叫摩羅廟街,無論被稱為「摩羅差」嘅印度籍警察定被稱為「阿差」嘅印巴籍人士,都帶有貶意同歧視意味,伊斯蘭教亦於本地愈趨神秘。



清真寺雖然現時為薄荷綠色,但實際上原色只係被髹成灰白色,仔細啲會發現綠色底下其實係白色嚟。而大殿正門以傳統伊斯蘭拱門設計,門口有寺院石碑,室內則為長形,外面就有阿拉伯色彩嘅洋蔥形拱窗。

寺內亦有一座呼拜塔,而呼拜塔陽台嘅用途就係作為召喚穆斯林(即伊斯蘭教徒)做禮拜,每次禮拜約15分鐘。1915年重建後,保留清真寺尖塔,塔頂亦非常突出,頂端可見星月標誌,而星月標誌正象徵伊斯蘭教嘅星月徽。


E.A.Tips :

(1) 唔建議進入室內範圍,室內不時有崇拜、聚會,勿騷擾教徒,只係喺外面觀望就好。

(2) 位置於些利街、摩羅廟街交界,只需乘搭中環至半山嘅扶手電梯,直至近頂端位置,即會見到左邊有閘口。

(3) 一般清真寺開放公眾,除咗週五聚拜,週日會有教徒作義務導賞員,介紹伊斯蘭文化。


(4) 踏入清真寺請保持安靜,勿騷擾教徒。


些利街清真寺

香港島中環半山些利街30號
10:00 – 21:00
2523 7743

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!