大埔小巷和食居酒屋秒到日本午市套餐豐儉由人啖啖超滿足全蟹豪華爆丼！

[sig_post_pv label=””] 個人瀏覽過

於橫街窄巷內搵食，不時會有驚喜，今次編輯走到太和小區內，赫然發現一間相當有日本風嘅和食居酒屋，由裝潢到食物，以至環境、背景音樂，都充滿日式風格，倘若拍拖兩個人掛住日本美食，不妨搵吓小區小店，隨時比大型連鎖店有驚喜。

門口以「溏串小町」命名，門口有彩色鯉魚旗，甚吸睛，編輯不諳日文，翻查下得知「小町」指當地美女，至於「溏串」則未知道所屬意思，兩者串連起來幾吸引。

推門而進，室內裝潢有日本風格，牆壁更以日本漫畫設計，而從菜單中可見，有午市、晚市套餐，包含壽司、刺身、燒物、串燒等，午市套餐嘅價錢亦唔算太貴，屬親民價，但份量非常充足，當中午市魚生定食套餐包含壽司刺身、前菜、米飯，部份套餐亦有醬油湯烏冬可擇，以日式料理為主打。

小町刺身定食$148，刺身款式同份量都係驚喜之選！定食包含15款刺身，有特大赤海蝦、磯煮鮑魚、海膽魷魚、溏串玉子、三文魚、油甘魚、劍魚腩、吞拿魚、鱆紅魚、鯛魚、北寄貝、八爪魚、帶子、赤貝肉、馬刀貝，而刺身選料唔差，尤其係魚類、貝類，有新鮮度，入口鮮甜，三文魚、油甘魚等亦夠厚肉肥美，赤貝肉、馬刀貝亦夠爽甜，同時有一小板海膽，非常滿足。

和風蟹逅特盛丼$108 配清新開胃前菜、麵豉湯之餘，丼飯滿到瀉，內含鱈蟹鉗、松葉蟹腳、蟹肉、蟹膏、炸軟殼蟹、牛油果、蟹籽、玉子、蟹棒，材料豐富，由蟹肉食到蟹鉗、蟹腳，更有蟹膏、蟹籽、蟹棒，更特別脆炸一隻金黃色軟殼蟹，一次過可以食足7款蟹味食材，絕對夠晒豪華。

小食有清酒煮蜆、豚之拼盤、冰鎮原隻魷魚仔，尤其係另可以加$20叫多隻特大赤海蝦等新鮮刺身，但經濟少少就揀咗炸紫薯甘栗餅$18/件、串燒豬五花腩$28/串，都係非常適合佐酒小食，特別係後者。紫薯甘栗餅外脆內軟，表皮炸成金黃色，炸粉唔太厚，內餡有軟綿綿嘅紫薯肉，更有非常有咬口嘅原粒甘栗，整體鹹中帶甜。

而串燒豬五花腩則係一款編輯私心推介小食，串燒炮製得夠香口，上枱熱辣辣，略有調味，同普遍串燒一樣帶鹹味，五花腩肉脂肪適中，肉、脂肪比例恰好，並非大部份都係肥膏，入口既有豬油感，亦有陣陣肉絲香，有肉汁，唔會過份肥膩，鹹度適合佐酒，若果表皮燒得略帶微脆會更有咬口。

E.A.Tips﹕

(1) 飲品有日本啤酒或釀酒，$28至$680豐儉由人，唔飲酒選擇有日本蜜瓜味或提子味汽水$20/罐。

(2) 小店以QR Code點餐，可以於門口先睇Menu，進入餐廳後會有一個點餐QR Code。

(3) 餐點另收加一服務費。

(4) 除咗午市套餐，其實酒類都唔少，亦好多串燒選擇，原為串燒小店，更適合晚市時同另一半或知己好友相聚。

(5) 每人會有杯玄米茶，可添加，若飲品唔適合都可以飲茶，玄米茶入口幾甘香，味道並非柔情似水。

(6) 其實小店內更有兒童餐，即使攜同小朋友都可以去食吓嘢。