2021-05-17

【五一懲罰祭】尖沙嘴人氣燒肉刺身放題 每位送台灣金鑽鳳梨 兩小時任食大啖肉有無得回本?

86 個人瀏覽過





上年有「五一黃金週」,今年5月1日至5月9日亦有「五一懲罰祭」,身為香港人一定繼續分散懲罰一眾良心小店。而App Store嘅「懲罰Mee」App於5月1號已經推出,利用App可以自由穿梭有參與活動嘅小店,更加可以儲分,你又有無Mee會員呢?

踏入「五一懲罰祭」,想食返餐好又揀咩好?日本料理向來大受香港人歡迎,尖沙嘴有一間日式放題兼燒肉餐廳「燒魂一」,為比較少有嘅放題良心店,同時主打燒肉放題兼刺身放題。呢間燒魂一開業逾十年,一直為人氣燒肉放題店,必須提早預約先有機會食到,到底係咪真係咁高水準呢?拍拖兩個人又點樣先可以回本呢?

尖沙嘴店比較寬敞同略帶時尚感,餐廳有唔同種類嘅肉類可供選擇,覆蓋範圍廣泛,包括牛、豬、雞、沙律、刺身、壽司、火炙同創作壽司、炸物、潮燒、蔬菜、海鮮、飯同烏冬、一品料理,一開波先點一輪沙律、燒肉、刺身,然後再按喜好點其他種類,包含各款熟食。

當中主打嘅牛肉類包含黑毛飛霜空降和牛、鮮蕃茄霜降和牛、西柚汁霜降和牛、汁燒安格斯骰仔粒、壺漬牛粒、香蔥薄牛舌、薄切牛舌、騷騷牛里肌、西柚汁牛里肌、鮮蕃茄牛里肌。飛霜空降和牛雪花分佈平均,和牛算係比較重油脂嘅選擇,放上烤爐後,質感軟嫩,肉汁豐腴,入口即溶;骰仔牛粒就比較有牛味,而且質感鬆化;而最大驚喜反而係牛里肌、牛舌,燒得略帶燒香就夠可口,軟稔有牛味,脂肪唔多,有爽口感覺。

豚肉則有奧斯卡豚后肉、蜜運豚后肉、香茅豚后肉、血池赤豚小排、面豉黑豚大腸、鹽燒一口骰仔豚,豚肉比較搶火,豬油通通被逼出,油份沾滿網面,以安全計最好放網邊。當中大腸既有油脂香,亦有彈牙感,稍有驚喜。豚肉雖然切得偏薄,燒得香口,遍佈油脂香,但大多為脂肪,比較膩同飽肚,故此淺嚐就好,避免食唔落其他食物。

     

刺身、壽司類就有三文魚、吞拿魚、鮑片、希靈魚、玉子燒、深海八爪魚、馬刀甲、原隻甜蝦等,甚至火炙壽司,每件壽司飯糰唔大,被捏成細細粒狀態,唔算太飽肚。而刺身當中有一款近七吋連頭大甜蝦,的確好吸引,冰鎮住嘅大甜蝦幾新鮮,鮮甜而爽口,可以無限食大甜蝦,刺身係平時貴得嚟唔飽肚嘅嘢,都可以算係回本之選。

前菜有帶有蒜蓉汁嘅泰式生蝦,亦有嫩滑胡麻冷豆腐、沙律,酸酸生甜夠開胃。熟食有海老天婦羅、蟹棒天婦羅、南瓜天婦羅、榴槤炸彈、軟綿綿質感似足煨蕃薯嘅日本迷你一口甜薯、黃金蝦棗、澳洲草飼和牛丸、川辣牛丸、薑汁皮蛋貢丸等,雞中翼既搖身變成單骨雞翼,亦有唔同口味,包括香茅、生薑、柚子蜜薑、孜然味,不過就唔太入味。甚至有懷舊碗仔翅、蒜爆通菜、胡椒牛骨湯、青椒豚肉生薑燒、卜卜煮大蜆、蕃茄薯仔和牛烏冬,甚至菠蘿炒飯等,泰式炒飯於日式燒肉放題都有係稍有驚喜,為即叫即炒,熱辣辣上枱,飯粒乾爽,加上肉鬆點綴,整體幾香口。

蔬菜類有燒完都Juicy嘅黑松露雞脾菇、甜心粟米、芝士翠肉瓜、感動洋蔥、戀人菠蘿,近排重有期間限定嘅台灣金鑽鳳梨,鳳梨比普通菠蘿更有果香味同香甜味,密密燒、啖啖肉過後,將鳳梨當作飯後甜品有清爽解膩感覺。

餐廳雖然環境舒適,但用餐兩小時比較食得匆忙,而特首講明唔打針唔可以逗留超過10點,令一頓飯食得更頻能,未完全可以享受一餐日式燒肉放題。而餐廳方面最大缺點除咗比較重油煙,同時欠缺甜品,飲品亦比較少,連清水、熱茶都無,每人只包兩罐汽水,其他飲品都需要另外收費,價錢上的確可圈可點。


E.A.Tips﹕

(1) 位置於尖沙嘴漆咸道南、金馬倫道交界,對面係首都廣場,但入口於漆咸道南。

(2) 夜晚劃一收費,成人每位$338,120cm以下小童、持長者卡者就$198,另收加一服務費,由用餐時間為2小時,但夜晚時段目前只有18:00至20:00、20:00至22:00。

(3) 如果升級任食海鮮,可以加$60,除非好想食蠔,否則無乜必要。

(4) 飲品會包兩罐無酒精飲品,酒精類飲品另加$70,但未成年就勿飲酒,而成人飲酒後亦謹記唔好揸車。

(5) 雖然用餐時間2小時,但一般45分鐘前就會Last Order同要埋單。

(6) 如要換燒烤網,要另加$15。

(7) 熟食漏單情況比生食多,想短時間食得多就多點生食。

(8) 台灣金鑽鳳梨為期間限定,為3月至今嘅優惠,每位都有一件。

(9) 呢間人氣燒肉放題抵唔抵食見人見智,但如果食就要好好分配時間,否則呢間的確會比較趕急。

(10)入座只有兩段時間,想早少少就要比8點更早,因為同一時段係會計攞籌順序入場,早到早入座;而一到離座時間亦必須離座,要避免連累店舖被咬。

(11) 每人枱頭都有3款醬料,包含沙嗲辣醬、泰式酸醬、同日式燒汁,一種帶辛辣味,一種為清新酸甜味,另一種則為鹹中帶甜味。燒汁係最正常嘅醬料,亦係最穩陣同不敗嘅醬汁;而酸醬感覺稍為醒胃,配搭起來有新鮮感;辣醬就比較香口,但唔能夠蘸太多,因為會覆蓋肉味。

(12) 切得太薄嘅肉類唔可以燒太耐,因為會變得好韌。


燒魂

尖沙嘴漆咸道南57-59號金馬倫中心2樓
星期一至五 17:00 – 00:00;星期六至日 12:00 – 00:00
2366 6072

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱