N.O.T. Specialty Coffee

港版玻璃咖啡館! 銅鑼灣鬧市藏樓底特高夢幻玻璃屋 週末拍拖慵懶歎咖啡

[sig_post_pv label=””] 個人瀏覽過





唔少人走到台灣、泰國等國家,都會搵吓適合打卡嘅玻璃咖啡館,尤其係伴隨午後陽光嘅時候,身處玻璃屋內感覺寧舍悠閒。事實上,香港鬧市亦有一間樓底特高嘅玻璃咖啡館,適合兩個人週末Chill吓,而呢間咖啡館竟然位於銅鑼灣鬧市!

N.O.T. Specialty Coffee命名嘅咖啡店,目前於銅鑼灣有兩間分店,一間位於利園一期,另一間則位於希慎廣場內,靠近文青情侶最愛逗留嘅誠品書店。小店採開放式設計,一室設計簡約,而希慎廣場分店更以玻璃屋設計,盡頭有巨型落地長玻璃配合特高樓底,拉闊空間之餘亦零壓逼感,同時可透視銅鑼灣鬧市景,視野廣闊。

室內有吧枱櫈,Corner位亦有設計成小花園嘅雅座,門口對出更有少量枱櫈,座位唔算太少。小店以原木傢俬為主,化繁為簡,加上玻璃屋設計採光度高,自然光令一室明亮,坐於咖啡館內悠閒舒適,無論獨坐或情侶拍拖排排坐,抑或樓上打工仔落樓食個Lunch兼歎杯咖啡都好適合。

食物方面以輕食為主,既有吐司、三文治、漢堡、貝果、蛋糕,亦有意粉。Scrambled Eggs and Avocado Toast $52 價錢算合理,包含Creamy炒滑蛋,新鮮牛油果、Sourdough 酸種麵包、Papriki 紅甜椒粉。以酸種麵包作多士逐漸變成潮流,比一般麵包帶香味,微酸,多士烘烤後較脆口,加上牛油果、炒蛋,將牛油果切片後放最頂端,目測有半個牛油果,多士同牛油果中間內餡為軟滑炒蛋,炒蛋比較厚,好重蛋香味,調味方面唔錯,整體食落輕盈,但有飽肚感。

雖然係堂食,但部份採紙袋包裝,例如The New Yorker Bagel $58,僅以鹹牛肉配搭蕃茄、芝士、火箭菜、酸瓜、芥末籽醬,鹹牛肉算軟滑,芝士味道唔突出,入口食到嘅都係一堆沙律菜。既然以紙袋包裝,就當外賣帶走食,貝果質感比一般貝果硬,但唔係脆感,唯一總結係欠缺煙韌感,味道亦比較淡,比較失水準。



歎完輕食歎返杯咖啡,來一個安靜嘅Coffee Time,咖啡等候時間唔太長,約莫5分鐘就可以拎得,一杯Caffe Latte $32,有拉花、無杯蓋,咖啡味唔算太濃郁,略有甘香,帶香醇感,奶泡唔少,質感豐富,水準不過不失;而Flat White $32 奶泡向來比Latte少,液體牛奶較多,咖啡味更少,稍有酸味,似採用烘焙比較少嘅咖啡豆,入口比較重奶香,質感更絲滑、柔順。


E.A.Tips﹕

(1) 走入希慎廣場,向最尾往誠品書店嘅扶手電梯直上,到達9樓後,唔需要走入誠品書店,一直向右行就會見到咖啡店隱藏後面,不過離開時都要經過誠品書店先可以直落地下。

(2) 若人流比較多時,用餐時間一般會限時90分鐘。

(3) 如果想打卡,可以盡量挑選朝早時間,人流會比較少。

(4) 近入口櫃台一般係點咖啡或Bagel,若要點其他輕食,要行過去右邊櫃台。


(5) 再搭扶手電梯走上一層樓,從上層高空拍攝咖啡店會更有效果呢!


(6) 右邊有幾個小花園枱櫈,背後有Cusion,可以墊住坐,位置其實比吧枱櫈舒服。


(7) 咖啡沖泡出嚟比較滿,加上紙杯盛載熱飲上手比較危險,拎落嚟又會好容易滿瀉,要特別注意。


(8) 食完嘢謹記自行清理枱面,避免下一個要幫你清潔,因為店員唔會特別清理。


N.O.T. Specialty Coffee

銅鑼灣軒尼詩道500號希慎廣場9樓
星期一至五 08:00 – 20:00;星期六至日 10:00 – 18:00
2151 3822

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!