2021-05-17

紙盒漢堡潮避「走樣」 香港人漢堡登陸葵涌廣場 迷你Burger一啖入口?

HONG KONG BURGER 葵廣

79 個人瀏覽過





近日,有指香港麥當勞將魚柳包由純紙包改為盒裝,避開外賣麵包頓變皺皮嘅形象,企圖改變以往被批評Burger「理想與現實」嘅狀況,不過記者有得揀都唔想食「港版金拱門」,所以就未知紙盒裝魚柳包同舊時嘅發泡膠盒裝魚柳包有無咩分別。的而且確,好多漢堡包店都係用純紙包裝,即使高水準如嘉寶漢堡,都會因紙包漢堡而「走樣」。最近葵芳葵涌廣場就有一間全新嘅漢堡包專門店,追上潮流選用紙盒包裝,既有正常Burger Size,亦有迷你版一口Burger,特別之餘亦有種豐儉由人嘅感覺。

若選用紙盒包裝,則可令Burger保持原形,減少擠壓,麵包表面亦唔會變得皺皮,將Burger外賣亦可維持本身飽滿狀態,打開外賣盒仍然可以見到麵包皮立立令,令外賣都有堂食感覺。近日,3月於美孚開業嘅 HONG KONG BURGER 接力於4月進駐葵芳葵涌廣場,甚為進取,美孚店售賣Pizza、意粉、Burger,而葵芳店則主力售賣Burger、熱狗,Burger不單有正常漢堡包Size,更特別推出迷你版Burger,有如一口Burger般可以一啖放入口。

HKER自家製手打牛肉芝士漢堡$46,包含手打牛肉漢堡、菠蘿片、芝士片、西生菜、紫洋蔥,配合他他汁後有幾分似魚柳包。Burger內嘅漢堡扒為手打牛肉,但同一般漢堡稍有分別,並非厚實類型,呢種鬆散質感未必人人接受,但記者反而幾欣賞。手打牛肉入口軟稔,粒粒狀態連有牛筋,加上他他汁,整體比較黏稠。Burger內芝士味唔太重,有大片厚菠蘿片、生菜同紫洋蔥,降低牛肉帶出嘅油膩感。

除咗一般Burger,特別之處係有一口迷你漢堡系列,其中一款係迷你自家製吉列煙豚肉芝士漢堡$26,內含吉列煙豚肉漢堡、蕃茄片、芝士片、西生菜,加上豬扒汁更香口,豚肉經脆炸後變得酥脆,略有煙燻味。迷你Burger比正常Burger大概細一半,價錢同樣平近一半,整體其實同正常Size差唔多,麵包亦保持飽滿狀態,方便攜帶之餘,若個口比較大亦可以一啖放入口,避過醬汁四濺嘅尷尬狀況。如果拍拖兩個人唔太大食,又或者想平啲食吓唔同口味嘅Burger,可以揀一口漢堡㗎。

     

8款小食當中有日本迷你甜薯、椒鹽脆薯條、吉列芝士條、脆辣香雞塊、麥樂雞、香辣炸薯角、炸脆薯格、流心芝士蝦球,適合作下午茶。甜薯條比較乾身,齋食蕃薯條入口比較寡,但配合醬汁就比一般薯條好,尤其係黑松露醬,而芝士蝦球雖然香脆,但芝士味唔夠濃郁,若非即食則無乜流心感覺。

小食可配上8款醬汁,包含南非酸甜醬、茄汁、黑松露醬、蜜糖芥末、日式芥末沙律醬、千島醬、酸青瓜芥末籽醬、他他汁,當中黑松靈醬夠香口,而酸青瓜芥末籽醬亦夠醒胃,醬汁可為味道提升,為小食點睛之筆。


E.A.Tips﹕

(1) 葵芳店位於葵涌廣場2樓。

(2) 新張期間,漢堡一律減$4,迷你漢堡一律減$3。

(3) 漢堡加$10至$15有小食、汽水,每款小食可以揀一款醬汁。

(4) 滿$40有一個印花,滿8個印花可當$40使用。


HONG KONG BURGER

葵芳葵富路7-11號葵涌廣場2樓潮流廊2018號鋪

HONG KONG BURGER

九龍吉利徑6-8號百老匯街74號地下74C

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱