大埔元洲仔神秘海岸生態遊孤獨海島藏古蹟紅樹林望吐露港度假風藍色小屋/停機坪打卡

[sig_post_pv label=””] 個人瀏覽過

新界有唔少鮮為人知嘅秘境，今次走到大埔市中心，介紹吓市中心附近一個孤獨海島，位置匿藏於吐露港灣畔一個公園側，人煙稀少，既有直升機停機坪、大有來頭嘅法定古蹟，亦有紅樹林等生態，週末拍拖談心兼影吓相非常適合，值得兩個人逛一逛。

延伸閱讀﹕【野餐隨行】大埔商場便攜素食便當/一口雲吞蝦籽麵元洲仔全海景公園Chill住歎咖啡

元洲仔一詞，聽落好遙遠，其實只係位處大埔東面，由大埔市中心舊大埔警署綠匯學苑步行到元洲仔海旁，腳程只係約15分鐘，海島旁邊有元洲仔公園，公園於90年代建成，位於大埔海濱公園對岸，靠近林村河、完善路，附近有單車徑。小公園表面平平無奇，但事實上對出隱藏咗一個河堤之上嘅小島，可飽覽吐露港景致。

步出元洲仔公園，見急救站即可沿元洲仔里進入，2分鐘即達海邊，同時會見到世界自然(香港)基金會嘅自然環境保護研究中心（WWF-Island House）。而WWF-Island House呢座建築物其實係前政務司官邸，於1906年建成，最初係英國租借新界後用作行政中心之用，其後變成新界政務司官邸，原本四面環海，70年代填海後先將元洲仔同內陸連接，自始唔再係一個小島嶼。

而呢座建築物於1982年更被列入香港法定古蹟，4年後再交予世界自然基金會香港分會作自然環境保護研究中心用途。WWF-Island House樓高兩層，整座大宅以紅磚、石灰舖砌，保留20世紀初英國殖民地式建築，既有英式庭園，內裏亦有大草坪、圓拱形遊廊、燈塔等，而燈塔曾為吐露港船隻引航，有豐富殖民色彩，有如小島上嘅英式小屋。

元洲仔本來係一個圓形海島，原本叫圓洲仔，後來叫元洲仔，海島前臨大埔海，於歷史上曾經係盛產珍珠之地，為農民、漁民聚集地，目前沿海位置仍然可以見到少量海洋生態物種，例如海邊嘅紅樹林亦相當明顯，充滿保育價值，加上比起人煙稠密嘅市區，總算係遠離繁囂。

而元洲仔海旁位置，可清晰眺望對岸嘅大埔海濱公園，中央回歸紀念塔亦非常明顯，甚至可見大埔工業邨，加上前臨吐露港，可飽覽大埔吐露港海景，亦可遠眺三門仔、馬鞍山。走入元洲仔石灘，可見唔少環保裝飾，於石灘上影吓相，似足身處一個孤獨海島之上。

倘若唔經海旁石灘走，可折返入口，沿單車路走，經過大王爺廟，即可安全地走入另一邊入口。沿此路可直通小碼頭，輕鬆到達紅樹林位置、大埔元洲仔直升機停機坪，此處不時可見釣魚客垂釣。加上從直升機停機坪離開時，不難發現停機坪同小碼頭中間有一間藍色小屋，小屋被髹上蔚藍天空色彩，充滿度假風情，有種穿越外國度假感覺。

E.A.Tips :

(1) 巴士路線26, 64K, 72A, 73A, 73X, 806A 皆可到達元洲仔公園。

(2) 元洲仔公園基本上離大埔廣福邨只係10分鐘左右腳程。

(3) 元洲仔並無停車場，一係泊喺大埔海濱公園嗰邊，然後經完善路步行2分鐘過去，一係就乘搭公共交通工具。

(4) 謹記保護海岸生態，唔好污染或破壞。

(5) 自己垃圾自己帶走。

(6) WWF-Island House不時會舉辦元洲仔秘密花園導賞團，由10:00至13:00、14:00至17:00，有興趣想知詳情請瀏覽返官方網站。