Fast Taste (福華街)

實試深水埗人氣Burger店 $99矜貴鵝肝牛漢堡焦香撲鼻

[sig_post_pv label=””] 個人瀏覽過





由長沙灣開到深水埗嘅人氣漢堡店,被唔少人大讚出色,然後吸引一群人慕名幫襯,據稱不單大件夾抵食,Burger啖啖肉之餘,多層餡料勁豐富,似乎好適合拍拖兩個人去開餐,到底係咪真係咁高水準?除咗Burger,其他西餐菜式又係咪同等水平?

呢間西餐廳裝潢簡單,以黑色拼橙色,亦可見紅磚矮牆裝飾,走型格風,狀似美式餐廳。菜式則以Burger為主打,和牛、鵝肝、原隻軟殼蟹、鱈魚柳、炸雞髀等都可放入漢堡包內,另有素牛扒、素雞扒Burger俾素食人士,10款Burger任君選擇,由$52至$99都有,豐儉由人,總算係平民西餐。

當中極上和牛堡 $85,包含和牛漢堡、車打芝士、黑松露炒蛋、生菜、蕃茄、蜜糖芥末醬,似夾心三文治,和牛漢堡扒下有可中和油膩感嘅爽脆生菜、蕃茄,重有熱溶車打芝士,而和牛之上就有質感軟滑但味道唔太搶嘅黑松露炒蛋,加上淋有蜜糖芥末醬,非常香口。和牛充滿牛味,有油脂香,肉質軟嫩,充滿肉汁,略有焦香感。所有Burger均採用芝麻包,表皮偏脆口,似輕微烘焗或煎香過,滲出芝麻香,麵包內裏尚算鬆軟,唔算太突出。

論及更豐富餡料,絕對要數焦糖鵝肝牛肉漢堡 $99,包含焦糖鵝肝、自家製牛漢堡、車打芝士、生菜、蕃茄、蜜糖芥末醬,特別以鵝肝作餡,聽到都覺得矜貴。鵝肝面積為一口鵝肝,啖啖滲出油脂香,略有焦糖香甜味,切開已開始溶化,然後入口即溶,只係比較細舊,而牛肉則比較厚實,焦香比牛肉香味重。Burger同樣大大份,除咗焦糖鵝肝、自家製牛漢堡扒,其他配料基本一樣,厚度十足,夠足料,多餡又爆汁,相當滿足。



至於其他西餐菜式,似乎比較少人嚐試,今次就叫幾份試吓。紐西蘭肉眼扒(10安士)配薯菜 $168 肉質軟嫩程度尚算可接受,比較有咬口,但牛味不足;比較重牛味嘅係安格斯牛柳粒黑松露意大利飯 $98,飯粒為典型意大利飯質感,偏硬身,牛柳粒比起肉眼扒更有牛味,只係份量比較少。

法式香草烤羊架配薯菜 $158 嘅羶味唔算太重,羊肉軟嫩,稍有肥膏,略嫌烤羊架太熟,脂肪較多;編輯所揀嘅4款西餐菜式中,以秘製士多啤梨醬燒豬肋骨配薯菜 $138 比較出色,雖然豬肋骨比較少肉,但肉質夠嫩,唔會黐牙,容易骨肉分離,以士多啤梨醬調味後,入口酸甜,夠醒胃。

小食亦有不少,例如芝士條、似生炸式炮製嘅原味雞翼,而薯條份量則比較多,一來厚切,二來堆疊起嚟份量唔少,薯條夠大條,炸得香脆,略嫌唔夠薯香味。雜果賓治、青檸梳打夠清爽,而香芒橙汁、柑桔檸檬等為套餐飲品,並無芒果肉或柑桔肉,但有輕微果肉香甜味。


E.A.Tips﹕

(1) 小店只收Cash,唔收Credit Card,記得帶足夠Cash啦!

(2) 逢星期一至五升級$10可加飲品、小食,而星期六、日則升級$18亦可加飲品、小食。

(3) 部份飲品可免費,而部份則可以半價享用。


Fast Taste

深水埗福華街110號地舖
12:00 – 22:00
6162 8045

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!