澳門公雞葡國餐廳
兩個人旅吓行

逾30年澳門餐廳 歎正宗地道葡國餐



呢間喺澳門逾30年,主打葡式美食嘅餐廳,菜式簡單貼地,夠正宗,味道亦好,氣氛唔錯,最啱去澳門拍拖撐枱腳!

餐廳面積唔算太細,裝潢滿滿歐陸式鄉村風情,例如馬賽克磁磚同公雞裝飾品幾得意。

坐低好舒服,而可慢慢點菜慢慢品嚐菜式。兩個人叫咗個湯同沙律先,本身有柔軟嘅豬仔包可送湯。有蝦湯同南瓜湯揀,蝦湯較香濃,南瓜湯就比較甜,湯好creamy,沙律好清爽開胃,但肉就偏鹹。

主菜有必食嘅焗葡國雞同蝦,兜蝦其實有少少唔抵食。不過葡國雞就好味,葡國汁好香,雞肉夠大塊而嫩滑吸收晒醬汁,小編最鍾意反而係主菜入面啲薯仔,薯仔軟淋淋又索汁,好似薯蓉質感。

甜品仲有Souffle梳乎厘,份量係你想像唔到咁大舊,梳乎厘成隻主菜碟咁大個,同平時食嘅好唔同,即叫即焗,食完晒主菜先上甜品。焗梳乎厘表面香脆,內裏鬆軟,梳乎厘焗完之後表面呈啡色,而且凹凸不平,望落好有療癒感。

梳乎厘必須熱辣辣時食,否則凍咗就唔好味同塌晒,切落去之後,入面軟心,好鬆軟!外脆內軟嘅口感絕對令人一口接一口,仲有梳乎厘唔算甜,甜度剛好,即使唔嗜甜都會啱食。

公雞葡國餐廳

地址﹕新馬路東方斜巷百寶大廈地下A號舖
營業時間﹕12:00 – 22:30
電話﹕2882 7423

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!