澳門倫記軟滑腸粉
兩個人旅吓行

澳門經典軟滑腸粉 份量充足最啱開心Share



澳門呢間腸粉店好多人都食過,澳門地方好細,由大三巴戀愛巷嗰頭行過去其實唔係好遠,兩個人喺澳門市中心拍拖行街一定會經過。

小編去到嗰時咁啱老闆出咗去送外賣,唯有坐低等陣,坐喺無老闆無伙記睇住嘅舖頭入面等,等咗約15mins就返嚟。當時遇到同樣嚟自香港嘅情侶,大家一齊睇住新聞一齊鬧政府鬧警察,撐手足!但唔記得攞對方contact,不過唔緊要,一切在心中。

我哋叫咗2款腸,份量其實幾多,價錢只係十零廿零蚊,全部即叫即拉即蒸,以質素嚟講,等多陣都值得。倫記正腸即係純齋腸,落豉油已經好好味,腸粉皮超滑溜,而且好薄皮。

另一款係蔥花雞蛋腸,平時唔太鍾意食蔥花嘅小編覺得今次又OK,雞蛋包裹滑嫩腸粉,腸粉皮薄,雞蛋皮亦薄,卷埋都唔厚,入口層次豐富,雞蛋香滲透腸粉當中。

老闆以米漿整腸粉,所以腸粉皮滿滿米香,最值得讚係腸粉皮滑得嚟唔會黏住筷子,入口更加唔黏口,亦唔會一夾即散,好順滑,少少豉酒同醬料就好足夠。

倫記軟滑腸粉

地址﹕澳門沙梨頭海邊街26號泉綵樓
營業時間﹕07:00–00:30(星期二休館)
電話﹕+853 2895 6563

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!