澳門新好利咖啡餅店
兩個人旅吓行

澳門新好利咖啡餅店 當地人必食鮮奶撻燕窩撻



去到澳門,本來想食另一間葡式餐館,不過一間無位,一間無開,一間太貴,最後兩個人入咗呢間平價嘅小餐館,拍拖平遊澳門搵食就一定食呢啲!

呢間睇落好似好多當地人食,發覺我哋應該跟返自己嘅決定,唔應該成日跟網上啲介紹,跟當地人食嘅餐廳應該會比較有特色。呢間餐廳距離官也街只需行3mins左右,門口貼咗好多相,原來好多明星名人都嚟食過,價錢好公道,對我哋香港人嚟講直程超平。

豬扒麵 MOP32 揀咗湯麵,碗內擺放一大塊豬扒,超霸氣!麵質彈牙,豬扒軟腍,煎得幾香口,不過豬扒另外放碟會更香,唔會浸晒落湯度,本來想試埋帶骨豬扒包,不過怕食唔晒就無叫到。

牛腩麵 MOP32 好驚喜嘅一碗麵!賣相其實麻麻,不過凡事唔可以睇外表,牛腩比豬扒更軟腍,燉煮完令牛肉質感更嫩,入口感覺成舊滷得軟爛,入口即溶,同樣配搭湯麵,湯麵有牛腩滷汁,好有牛腩味。

蘆薈柑桔蜜/金桔檸檬蜜 MOP16 只係簡單隨便叫兩杯嘢飲,都已經好夠,食完嘢飲杯凍飲好舒服,重點係呢啲唔會太甜。

燕窩撻 MOP16 / 鮮奶撻 MOP13 Miss A同Mr E好好彩見到佢啱啱新出爐,出爐蛋撻有6種口味,包括葡撻、酥皮撻、椰撻、鮮奶撻、燕窩撻、蛋撻。甜到漏嘅葡撻、蛋撻喺澳門好常見;仲有聞落好重椰子酥香嘅椰撻同有芝士酥皮嘅酥皮撻;而用牛奶整嘅鮮奶撻比較清淡,味道淡淡哋,好有牛奶味,但唔似葡撻嗰啲咁甜。當中最特別係燕窩撻,以鮮奶撻為基調,內餡有燕窩,入口有一絲絲燕窩感。

新好利咖啡餅店

地址﹕澳門地堡街13-14號舊城區
營業時間﹕07:15–18:15(一般飯鐘時間11:30 – 14:30)
電話﹕+853 2882 7313

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!