更快到起點方法！快閃大嶼山路線東梅古道輕鬆由東涌行到梅窩睇銀礦灣瀑布

[sig_post_pv label=””] 個人瀏覽過

想走上東梅古道，由東涌行到梅窩，大多數人都會以黨鐵東涌站為起點，個個都教路乘搭地下鐵去東涌，唔通個個都想搭地下鐵？大概係個個都貪嗰邊方便快捷，以為係最慳水慳力又慳時間嘅方法。今次記者就帶大家由另一條路線取替經地下鐵行東梅古道，拍拖亦毋須乘搭地下鐵路，都可以兩個人以東涌為起點行到梅窩！

東梅古道本身係大嶼山一條山徑，曾經係連接東涌至梅窩嘅唯一通道，由馬灣涌至白芒，經大濠村到望渡坳，再下行到梅窩銀礦灣瀑布，全長逾10公里。由呢條路線嘅起點行到終點梅窩碼頭，點對點2小時內可以完成，比起由地下鐵路站為起點，需要逾2小時先可以到達梅窩碼頭，時間更快捷方便。

若唔乘搭地下鐵路到東涌，其實青嶼幹線繳費廣場都有大量轉乘巴士可以到達東涌，只需乘搭可以抵達東涌迎東邨嘅巴士路線，走入一個油站旁嘅偏僻入口，沿無遮擋大直路而走，即可縮短行程，經翔東路對面海旁小路，穿過隧道可步行到香港奧運徑/東梅古道。該位置仰望一道通往港珠澳大橋香港口岸人工島嘅巨形天橋，完美地遮擋無敵海景，而近距離亦可見一艘艘細小嘅小艇。

經修整過嘅東梅古道，可以同時遊走2008年香港政府於白芒至梅窩一段建設嘅香港奧運徑，內裏鑲嵌咗11個運動項目標誌，故一道兩名。由奧運徑起，途經大蠔灣、三鄉，即古老村落白芒村、牛牯塱村、大濠新村統稱，沿途綠野片片，甚有田園氣息，但見得最多嘅睇怕都係村民對政府嘅控訴。步行約45分鐘，即可見到亞婆塱涼亭，只有少部份路段為緩緩上斜，分岔路左邊山路去愉景灣，前行則去梅窩。

前行10分鐘即可到達望渡坳避雨亭、海拔240米嘅標高柱，只屬一個小丘，可俯視梅窩一帶景觀，眺望喜靈洲、長洲北。中段可見山腰藏有一片無人草原，再步行15分鐘，經黃公田即可見到享負盛名嘅銀礦灣瀑布、銀礦洞，至於人流多與少，就要睇自己運氣，加上識唔識揀日子去啦。由瀑布下行，經過梅窩白銀鄉、文武廟，25分鐘可返回梅窩市中心、梅窩碼頭。

經小路而走，由迎東邨行到大濠灣，只係20分鐘腳程，比起東涌地下鐵路行到大濠灣要近1小時步程，可縮減1倍時間。

延伸閱讀﹕仙境變人間？梅窩銀礦瀑布滿佈人群流水聲變人聲+相機快門聲 50米礦道/隱藏廢棄小屋探秘

延伸閱讀﹕賣靚啡撐本土梅窩海邊咖啡店Caffe Paradiso 軟包似upgrade版「豬柳強」？

延伸閱讀﹕梅窩鮮為人知秘店Southside Lantau招牌香草脆皮烤雞最平$30/隻雞髀！

E.A.Tips :

(1) 乘搭37,37H,37M, E21X,E22S,E32A, N37,S52A, S56,S64P 均可到達迎東邨巴士總站，經過迎東商場、迎東街市，海旁位置通通為工程地帶，但離遠可見油站。於昇薈、映灣園中間十字路口對面小路進入，沿途會見到中國石化油站標示，直行到尾會見到行人隧道，右邊係地下鐵路軌，穿過隧道自然會到達香港奧運徑，沿途會見到東梅古道出口，接駁離島自然歷史徑－梅窩段。

(2) 路段全為石屎路，輕鬆易行，不過有唔少分岔路係泥路，避免雨天前後步行泥路。

(3) 山路唔算闊落，避免並排而行，阻礙其他人前進，行得慢就先讓路俾其他人先行。

(4) 勿喧嘩吵鬧，重有自己垃圾自己帶走。

(5) 從梅窩碼頭離開，可乘搭渡輪到中環或大嶼山巴士3M返回東涌市中心。

(6) 迎東商場、白芒村士多、梅窩市中心都可作補給點，而三鄉有洗手間可作方便之用。

(7) 經過白芒村更樓、圍牆、宗祠、門樓時，勿塗污或破壞，該歷史建築已被列為法定古蹟。