盛記麵家

文青Cafe?大排檔? 沙田逾60年雲吞麵老店一度告急

[sig_post_pv label=””] 個人瀏覽過





隱藏於沙田瀝源邨嘅雲吞麵老店,有逾60年歷史,於區內係一間老店,近年轉為一間揉合文青Cafe同大排檔風格嘅餐廳,朝早係賣麵賣飯嘅茶記、麵店,夜晚搖身變成火鍋店,新年更有售賣盆菜,近一年曾因欠缺人流而一度告急,但有麝自然香,有質素、價錢親民,其實不愁無生意。

踏入店內,感覺裝潢並唔似一間麵檔,反而似一間平時食裝修嘅文青Cafe,戶外有外國茶座,配搭太陽遮、茶座小枱櫈,似足小花園,而室內又充滿懷舊氣息,似乎將唔少物件廢物利用,再用以裝飾一室,滿滿藝術色彩,難以想像熟食中心有一間被花卉盆栽包圍嘅餐廳,值得兩個人拍拖去試吓。



經營逾60年嘅盛記麵家,位處沙田首個公共屋邨瀝源邨內,而瀝源有清水之源嘅意思,加上座落城門河旁邊,所以位置叫瀝源。盛記麵家嘅雲吞麵質素確係區內數一數二,一大碗雙拼麵$55,柱侯牛腩、鮮蝦雲吞份量充足,每樣少有3至4舊,牛腩軟稔,醬汁入味,雲吞皮薄,餡料足,蝦肉爽口,粒粒脹卜卜,而幼麵亦彈牙,份量亦多,配搭有腩汁味嘅湯底更滋味,難怪雲吞麵係招牌貨。

除咗麵,午市套餐重有飯,一個價錢有飯有餸有油菜,油菜可自己添加蠔油,生菜都夠爽甜。梅菜蒸肉餅$43,肉味濃,略有鹹味,唔會太鹹,撈飯一流,只係梅菜份量較少。凍檸茶嘅茶底有啲特別,同一般茶記唔同,茶膽較似西式紅茶,而檸檬更足足有半個,並非得兩三片檸檬,檸味充足。


E.A.Tips﹕

(1) 盛記麵家位置於沙田瀝源熟食中心,由沙田新城市廣場或瀝源邨步行至富裕樓、貴和樓,走下行樓梯,直到最底熟食中心、停車場。


盛記盆菜&盛記麵家

沙田瀝源熟食中心5號舖
06:00 – 16:00、18:00 – 23:00
2692 6611

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈文青Cafe?大排檔? 沙田逾60年雲吞麵老店一度告急〉中有 1 則留言

留言功能已關閉。