屬於香港人嘅食堂愈來愈多，屯門華都商場向來平價美食眾多，當中就有一間本地飯堂，每日有唔同菜單，由店名已經提醒大家唔好忘記手足嘅犧牲，兩個人有良知嘅話，拍拖食飯都要識揀。
華都商場呢間飯堂以水飯鏜命名，同監獄內嘅水飯房讀音相似，水飯房係監獄內嘅隔離囚室，穿梭商場走廊，風涼水冷，似行監獄，小店似乎每個字都提醒香港人要時刻謹記初心，幫助在囚手足。
小店貌似一間茶餐廳或平價飯堂，無論堂食定外賣，人流亦絡繹不絕，食物未必係最有質素，但總算正常。未必每個人都可以做大事，無大能力者以小行動去支持有能力嘅人去支持手足，一樣係對得住良心嘅行動，將本地人嘅經濟圈不斷循環，先稱得上係黃色經濟圈。
每款菜式都係符合大眾口味嘅選擇，款式同茶餐廳或飯堂差唔多，唔講美觀度，並非打卡菜式，極快將食物上枱，加上份量適中，受區內居民喜愛。今次一款係蒜蓉公司飯$45，飯粒尚算分明，入口乾爽，其實只係淋上蒜蓉茄汁，再配腸仔、火腿、餐肉、煎蛋，蒜蓉汁無爆香過，無乜驚喜。
每日午餐基本有5款可擇，湯飯就每日都有，另一款係紫菜魚片肉碎雞湯飯$47，飯湯分開盛載，湯內有紫菜、大量雞肉，雞肉帶骨，肉質唔算嫩，亦唔算嚡，一般水準，但無魚片、豬肉碎，反而有啖啖鏗魚汁味，以為食緊拉麵。
E.A.Tips﹕
(1) 華都商場靠近屯門市廣場，穿過商場轉左落樓梯，再轉右行到尾，5分鐘腳程即達；又或者於華都商場2樓落扶手電梯到1樓，轉右即達。
(2) 店內餐牌每日唔同，不過款式大致上相近，想預先知就要留意水飯鏜Facebook專啦！
水飯鏜
屯門屯利街1號華都商場1樓65號舖 
11:00 – 20:30 
3619 7264
