2021-04-10

【2021賞花地圖】浪漫紫藍花海!嘉道理農場高雅藍花藤開花 罕見密集白花油麻藤小花園 睇埋紫花風鈴木/榮光花

嘉道理農場藍花藤白花油麻藤紫花風鈴木榮光花

148 個人瀏覽過





148個人瀏覽過

向來物種豐富嘅嘉道理農場暨植物園終於喺上月重開,既可行吓觀音山,亦有有各式動物、多種植物可以觀賞,更加係春季賞花好去處之一,拍拖閒遊可以行足半日!早前嘉道理農場暨植物園就有櫻花、梅花、吊鐘花、桃花等綻放,今個月更有浪漫紫藍色嘅藍花藤、罕見嘅白花油麻藤等亮麗花卉,絕對值得兩個人去打卡!

甫踏入園內,記者被紫藍色花海吸引,左邊會先見到一棵壯觀藍花藤,滿屏紫藍色花海,散發浪漫氣息!藍花藤亦叫許願藤、錫葉藤、紫霞藤,英文甚至有Queen’s Wreath之稱,藍花藤嘅花語為天使之顏。而藍花藤原產自熱帶美洲、墨西哥,再引入華南地區,生長環境大多比較溫暖、濕潤、有強光,開花時會出現紫藍色花朵。

藍花藤花期為4月至5月,但目前3月已經開花,全為淡紫藍色調,加上呈星形,花朵層次分明,充滿夢幻感,非常吸睛!紫藍色藍花藤色澤鮮明之餘,帶有高雅感覺,毫不俗氣,但花期唔長。

繼續往內園走進,會發現一串串白花油麻藤懸垂於園內,形成一個白花油麻藤小花園,極震撼,路過都有清雅感覺。其實,白花油麻藤同紫調嘅常春油麻藤都係禾雀花嘅一種,一般於3月至4月春季至初夏開花。

白花油麻藤大多於郊區出現,於本地比較罕見,屬稀珍植物,由粗藤生出花枝,延伸到頂後嘅花朵會懸垂半空中,狀似掛於樹上嘅玲瓏翡翠鳥,每單一花序約有20至30朵花,而每朵小花介乎青色、淡黃至白色,更似足一粒粒青提一樣,當幾十朵花朵聚集而生,則似足幾十隻禾雀花,甚有趣。

    

另外,園內更有其他花卉可以觀賞,比如狀似風鈴、花期近尾聲嘅紫花風鈴木,顏色呈紫藍或淡紅,當花開滿時其實粉嫩色調有幾分似櫻花。而另一種值得睇吓嘅花卉叫光榮花,由南非園藝家韋爾斯柏太太(Mrs Dorothy Reyersbach Horticulturist )捐贈,呢種光榮花為南非樹種,呈橙紅色,無論名字定顏色、造型都相當搶眼。有指光榮花象徵榮譽,大多於夏季初期開花,光榮花花期為5月至9月,目前可以見到少量已凋謝,但大多都未完全開花。

嘉道理農場暨植物園靠近大帽山北面、大埔林村,背景原來源自英殖時期創立嘉道理農業輔助會嘅外國勢力胡禮先生(Dr. George Henry Bateson Wright)同胡挺生先生,直至今年已經開設第65年。除咗賞花,一嚐田園生活,內有9條生態徑、去龍亭、小瀑布,亦可以去觀音山頂峰行吓山,感受山林環抱感覺,望新界、深圳景,更可於園內睇昆蟲、蝴蝶、野豬、雞鴨、鸚鵡、貓頭鷹等。

小編講吓嘢﹕

當日小編於藍花藤底執拾已掉落地上嘅花朵於木枱拍攝,被一名遠離該位置、疑為園內嘅男人大聲警告唔好採摘花朵,好彩旁邊有2位女士同途人同時回應講執花唔係摘花、唔使理佢、當我哋咩人之類說話為小編反擊,非常感激!小編最憎人摘花、唔愛護花草,竟然俾人屈摘花,慶幸本地重有啲有良知嘅人,唔係全部都係唔知實情、揸住雞毛當令箭嘅偽君子,不過亦都反映事實上唔少人好多時候都係唔清楚實情就以偏概全。


E.A.Tips :

(1) 入場費每位$30,一般唔需要預約,12歲以下兒童、60歲以上長者、殘障人士、慈善團體、學校免費。

(2) 由大埔墟或錦上路交通交匯處轉乘巴士路線64K,可來往元朗西至大埔方向,於嘉道理農場暨植物園前門落車,車程約15至25分鐘;另來往元朗、大埔嘅紅Van亦會經過嘉道理農場暨植物園大門;巴士路線64K,64P,65K都可到達,但64P、65K分別只於平日下午、上午服務。

(3) 若要自駕可,要先申請於園內駕駛;另有約10個車位可供預約。

(4) 內有素食亭、小食亭,選擇有三文治、飛碟、沙律、咖啡等,以小食同飲品為主,最好自己帶定食物飲品,飲品價錢都唔平。

(5) 雖然於2月重開,但疫情期間,實施咗人流管制措施,限制人流之餘,入園訪客都要戴上口罩、消毒雙手、量度體溫,至於各導賞活動就通通暫停,直至官方另行通知。

(6) 藍花藤位置靠近大門口,另向左邊行都會見到。

(7) 愛惜花草,勿採摘或破壞。

(8) 尊重他人,勿於園內喧嘩。

(9) 愛護環境,垃圾要放入垃圾桶內。


(10) 賞花期有限,謹記留意開花時間,想睇就要盡快觀賞啦!

(11) 出發前,記得要先上官網留意最新資訊,避免有突發事件而白行一趟。


嘉道理農場暨植物園

新界大埔林錦公路
09:30 – 17:00(最後入園時間16:00)
2483 7201

Please Like & Follow & Subscribe /
歡迎讚好、追蹤、訂閱