元州邨簕杜鵑花隧道

【2021賞花地圖】有心人辣手摧花? 元州邨30米長夢幻杜鵑花隧道 嬌艷紫紅媲美外國浪漫花海



初春到來,元州邨簕杜鵑花最近開花啦!每年長沙灣元州邨嘅簕杜鵑花隧道都係唔少人嘅打卡熱點,最近有指被有心人辣手摧花,到底有無影響大眾賞花意欲?而唔少人都以為係杜鵑花,事實上元州邨內嘅花卉正名係簕杜鵑花。呢道足足有30米長嘅簕杜鵑花隧道,以攀藤嘅簕杜鵑花形成一片紫紅花海,絕對係兩個人拍拖賞花好去處!

賞花的確未必一定要出國旅行,目前本地人只能留於香港,賞花熱點又遍佈全港,長沙灣元州邨嘅簕杜鵑花近期亦已經開花,於30米隧道內攀附,唔少街坊路過都忍唔住打卡。以屋邨嚟講,元州邨嘅簕杜鵑花隧道都算係獨有,花海形成後有幾分外國感覺。記者現場所見,發現簕杜鵑花已經逐步開花,紫紅色花朵綻放,嬌艷紫紅色充滿浪漫感,鮮艷奪目,外藉傭工三五成群影吓相,大叔大媽興奮埋去隧道門口舉V打卡,而情侶們亦走進隧道內影吓女神照。



簕杜鵑花每年3至4月開花,原產自巴西,花色豐富,既有紫紅色,亦有粉紅、白、紫、橙色,更有黃色簕杜鵑,而元州邨內嘅簕杜鵑花有由2008年起種植,4年後形成極壯觀嘅簕杜鵑花隧道,都係紫紅色簕杜鵑,屬屋邨內獨一無二嘅景點,總算為忙碌本地人暫且遠離繁囂。簕杜鵑花現時生長依舊茂盛,於陽光照射下散發特別光茫,但姹紫嫣红於陰天拍攝亦別有一番感覺。簕杜鵑花包含三片苞片,苞片中嘅花芯先係花朵,苞片如紙薄,被叫Paper Flower,即紙花。香港叫簕杜鵑花,台灣叫九重葛,大陸叫三角梅,係中國廈門市花,紫紅色的確名副其實。

簕杜鵑花大多係藤蔓種植嘅植物,攀爬為主,一般需要定期修剪,不過日前簕杜鵑花隧道就被人惡意破壞,包括根部、枝幹被剪斷,記者發現簕杜鵑花隧道內多個當眼處被房署張貼告示,指簕杜鵑花被人蓄意剪斷破壞,既令花卉未能正常生長,涉事者亦會干犯刊事罪行。

簕杜鵑花花語係熱情、熱心、有希望,代表住堅忍、永不放棄,湊巧地上年隧道旁係元州邨為民主派初選地之一,但今年既無得投票,眾議員更身陷牢獄,經過隧道,本應充滿熱情,走出紫紅色簕杜鵑花隧道,又返回現實,再翻查資料,原來簕杜鵑花另一個意思係代表沒有真愛,係一種悲傷。


E.A.Tips :

(1) 杜鵑花隧道靠近元州邨元樂樓,隧道分為兩截,共30米長。

(2) 簕杜鵑花花期大概係兩個星期,要賞花打卡就要趁早啦!

(3) 影相還影相,記得尊重他人,並守秩序,唔好爭位影相,有技巧就企邊都影到靚相,and vice versa。

(4) 簕杜鵑花隧道處於屋邨範圍,謹記保持安靜,唔好騷擾居民。

(5) 記得將垃圾扔到垃圾桶內。

(6) 賞花用眼睇,謹記唔好觸摸或採摘花朵,同時唔好攀爬隧道上。


(7) 簕杜鵑花莖上帶有刺,所以叫簕杜鵑花,要小心安全。


元州邨

長沙灣元州街303號青山道303號
24hours
2728 7714

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!