[sig_post_pv label=”瀏覽：”]
本地人今年仍然未能去外地旅行，本地遊變成餘興節目，人人只能留港賞花，而香港今年滿佈櫻花地，多個公園都種植咗一棵又一棵櫻花樹，各有唔同櫻花品種。而大埔海濱公園不單有富士櫻，更驚現罕見嘅墨染櫻，櫻花於落雨期間仍保持儀態萬千，每片小花瓣被小水點點綴，更顯立體，絕對係兩個人拍拖賞櫻花好去處。
一般本地櫻花都係山櫻花，即鐘花櫻桃，又或者係富士櫻，甚至吉野櫻，但今次大埔海濱公園內有富士櫻之餘，竟然有一種墨染櫻，非常特別。每年3月起，都會陸續有櫻花盛開，今年3月上旬，14棵櫻花排列整齊，雖然未能形成花海震撼效果，但總算係鬧市賞花熱點，拍攝時配合技巧一樣影到靚相！
櫻花於陽光點綴下寧舍晶瑩剔透，而落雨過後，雨後櫻花被水點點綴，顯得更有立體感。墨染櫻花同富士櫻唔同，富士櫻同山櫻同種，櫻花較細小，色調偏向粉紅、淡紅；至於墨染櫻花嘅花瓣，就會由白色逐漸變紅，更顯獨特美感。
公園內不單有櫻花，更有唔同種類花卉可以欣賞，比如茶花、玫瑰花、鼠尾草等，當中玫瑰花花色有濃有淡，大紅、粉紅比比皆是，最特別係黃到金嘅黃玫瑰，花語有美好祝福嘅意思。
E.A.Tips :
(1) 櫻花嘅花期有限，要趁早去影呀！
(2) 乘搭巴士路線72A,73,73X,75X, 271,275R,74K,75K,71K,71S 於富善總站落車，經過完善公園，行隧道可以直通大埔海濱公園。
(3) 賞花用眼睇，唔係用嘴睇，謹記保持安靜。
(4) 愛護環境，垃圾要放入垃圾桶內。
(5) 櫻花位置靠近公園大發街入口，另一隅靠近去自然生態花園、昆蟲屋嘅小路，靠近大草地。
大埔海濱公園
大埔工業邨大發街
24hours
2664 2107
在〈【2021賞花地圖】激罕墨染櫻！ 大埔海濱公園一隅遍佈富士櫻 雨後櫻花更顯立體感〉中有 3 則留言
留言功能已關閉。