【2021賞花地圖】南昌公園黃花風鈴木綻放黃到金 2月搶閘開花迎接片片黃海

近年黃到金嘅深水埗，由區議會到黃店，每個角落都充滿痕跡，而每年南昌公園其實都有一片又一片黃海，講緊嘅係於公園內盛開嘅黃花風鈴木。今年2月，南昌公園內嘅黃花風鈴木已經搶閘開花，暫時公園雖然未完全開滿黃花，人流亦唔少，但總算仍然有空間拍拖影吓相，趁時間尚早，兩個人一於先去賞花打卡啦！

南昌公園內有超大草坪，劃分為五塊草地，既可野餐、放空或散步，春季花開時節更加係賞花熱點，花團錦簇，絕對係打卡之選。黃花風鈴木於春天盛開，朵朵鵝黃色生長樹上鮮艷奪目，帶有英氣之集，毫不俗氣，抬頭可見漫天黃中帶金，俯首亦不時見到遍地黃花。園內少有20至30棵黃花風鈴木，但目前只有兩至三棵黃花風鈴木盛開，遲啲全部盛開時，場面絕對會更壯觀。

黃花風鈴木亦叫Yellow Pui，無香味，原產自巴西、墨西哥，呈金黃至鵝黃色調，花冠呈漏斗形，有五片花瓣，狀似風鈴，而花緣皺曲，朵朵嬌艷欲滴，似報春。

而黃花風鈴木嘅開花期為3月至4月，現時2月中旬已經有兩至三棵開花，想避開始後洶湧而上嘅人群，早一步做「黃花閨女」，就要盡快去拍攝啦！

E.A.Tips :

(1) 由深水埗西九龍中心步行到南昌公園，腳程約15至20分鐘；而由V Walk步行過南昌公園，就只係約5分鐘腳程。

(2) 謹記愛護環境，自己垃圾自己帶走。

(3) 公園係公眾地方，並非私人地方，請保持安靜，唔好騷擾到其他人。

(4) 影相還影相，要尊重他人，守秩序，唔好爭位影相。

(5) 要注意同其他人保持距離，即使疫情期間想除口罩影相，都要確保幾呎內無其他人同時除低口罩，保障自己同他人安全。

(6) 愛惜花草，唔好隨意採摘或破壞花草樹木。

(7) 編輯剛砌咗個黃心喺石仔路，個人認為石仔路質感比較特別，配合陽光光線會更好，而另一邊草地亦有人砌咗個黃心，想打卡可以隨意揀選呢！

(8) 其實手執一、兩朵黃花拍攝會更有感覺，亦可突顯黃花風鈴木嘅細節位。