兩個人想行山又怕攰？今次帶大家行吓大帽山山腳嘅引水道，10分鐘腳程上山，20分鐘行引水道觀景，邊行邊望荃青葵市景，路段輕鬆，適合拍拖閒遊。
從老圍村出發，可以先遊覽逾370年嘅古老村落老圍、廢棄學校，更可一連參觀西方寺、香海慈航、圓玄學院、東普陀講寺、龍母廟等寺廟。老圍村背靠城門水塘、顯達鄉村俱樂部。翻查資料，老圍由1649年開村至今，歷史悠久，最初叫淺灣圍，屬荃灣一帶最早出現嘅古村落，由清初起叫舊村，曾建圍牆防海盜，村內以曾、張、黃、許、鄧五個姓氏嘅人合建，大多為客家人，以漁農業為主，每個姓氏都建於同一列房屋，故被稱作排屋，不過目前多咗相對現代化嘅三層式村屋，古樸、現代感並重。
老圍村內原有一間50、60年代建校嘅老圍公立學校，但80年代已經停辦，變成廢棄地，近年改為香港聖公會麥理浩夫人中心鄰舍層面社區發展部，旁邊係老圍村公所、同和社，現時僅遺留舊校舍操場、空置教室、籃球場，而長形石亭講台背後重有兩塊雲石碑誌，列出籌資建校嘅善長人翁。校舍只屬一列單層平房，現時保留咗舊校舍原有嘅桃紅色外牆，別具特色。而附近防土牆、石柱、圍欄外牆更有幾幅於2007年創作嘅壁畫，不過唔少顏色已掉落，但依稀睇到壁畫上繪畫出老圍村嘅特色。
沿老圍路轉入上角山路，可直上城門引水道，即大帽山山腳，芙蓉山為佛教勝地，途中可窺探左邊嘅西方寺九層塔、圓玄學院嘅標誌建築。上角山路盡頭會見到綠色鐵欄樓梯，可以接上城門引水道，對面會見到大圓石澗，亦石連接龍門郊遊徑，甚至川龍，若繼續前行可以行上大帽山，整段引水道係繞大帽山南坡而走，為荃錦公路至城門水塘嘅引水道，隔一段路就有一標柱標示。
接上引水道後，向左邊方向前行，約20分鐘可以行到866級樓梯嘅芙蓉山晨運徑，呢段引水道大概有1.6公里，近樓梯位置附近會見到涼亭。甫踏入引水道不久，即會見到一引水道下有一群小黑羊散步，一直沿引水道走，左邊沿路皆為觀景台，可下瞰荃灣、青衣、葵涌風景，甚至汀九橋、昂船洲大橋景色，此段路程可隨時休息。
從芙蓉山扶輪亭轉向芙蓉山晨運徑866級樓梯出口，向下行樓梯走，中段可以望望造型奇特嘅蟾蜍石，其後路段全為石屎路，下行樓梯輕鬆易行。走到地面，位置為荃錦公路，右邊可步向光板田村，左邊則為荃灣愉景新城方向。
延伸閱讀﹕荃灣隱世壁畫村 光板田村七色階梯打卡
延伸閱讀﹕慢活歎Brunch 南豐紗廠小店撐本地品牌手沖咖啡
E.A.Tips :
(1) 小巴路線81號可直接去到上角山路；巴士路線32,32H,32M,36, 40P,43P,43X,234C, 936,936A,N36 都可以到達老圍，步行到上角山路約10mins。
(2) 雖然靠近市區，但謹記仍要愛護環境，自己垃圾自己帶走。
(3) 若由荃灣愉景新城步行上芙蓉山，需要各上行900幾級樓梯，近千級階梯的確稍花氣力，若由上角山路上山，斜度無咁高，斜路亦會比較減省氣力。
(4) 引水道不時會見到小黑羊，記得唔好餵食、挑釁或傷害小黑羊呀。
(5) 引水道大多係遮蔭位，特別適宜夏天行走。
(6) 上角山路段有少量分岔路口，小心唔好走入人哋條村，皆因內有惡犬，跟指示牌行去上山樓梯就好。
荃灣老圍公立學校(舊址)
荃灣老圍路 
圓玄學院
老圍老圍路 08:30–17:00
芙蓉山
老圍芙蓉山路 09:30–17:00 2416 6557
