馬頭圍配水庫遊樂場+何文田上配水庫遊樂場+東何文田配水庫遊樂場+京士柏上配水庫遊樂場

土瓜灣何文田快閃遊點止紅燈山!40分鐘帶你行完4條配水庫後花園小山徑

[sig_post_pv label=””] 個人瀏覽過



一般配水庫係由於要提供足夠水壓,所以先會建於較高處地方,而何文田最出名嘅係紅燈山,但何文田有4個配水庫遊樂場,邊個配水庫先係紅燈山呢?登上4個配水庫遊樂場嘅路段亦相當輕鬆,人流唔多,景觀不俗,一條路線可直通4個配水庫,毋須1小時即可行完區內4個小山徑,絕對係拍拖兩個人散步好去處。

(1)馬頭圍配水庫遊樂場

第一個配水庫遊樂場靠近土瓜灣,位於靠背壟山,靠近樂民新村、半山壹號,只需少量腳骨力,沿屋邨旁邊樓梯上山即達小山丘,中途會經過靠背壟道遊樂場。馬頭圍配水庫遊樂場內有洗手間、更衣室,亦有網球場、戶外乒乓球檯,一般開放至下午6點,5至8月會延長至傍晚7點。山上可望兩邊綠油油山圾,更可俯視土瓜灣一帶市景,亦可眺望啟德、觀塘,景觀遼闊。而沿配水庫遊樂場旁邊小路直入,一個平台花園、一條小樓梯之隔,即可通往何文田上配水庫遊樂場,即紅燈山。

(2)何文田上配水庫遊樂場

紅燈山上建有上配水庫遊樂場,為何文田上配水庫遊樂場,一般統稱為紅燈山或採石山,紅燈山同深水埗嘉頓山差唔多,一樣位處市區,同樣輕鬆登頂,不過嘉頓山經常版擠得水洩不通,而紅燈山較嘉頓山高,約有106米高,係九龍界限街以南最高點,人流較嘉頓山少,比較適合上山抖吓氣。舊啟德機場年代時,紅燈山上曾設有一座燈塔,夜晚會發出紅光,所以被稱為紅燈山。山上可鳥瞰土瓜灣市景之餘,亦可遠眺九龍東一帶景色,甚至望整座獅子山。

由於曾經臨近舊啟德機場,山下土瓜灣一帶樓宇被設高度限制,故舊式樓宇高度一般較其他市區矮,目前新式樓宇則形成強烈對比,一棟棟向上發展嘅高樓大廈逐漸衝破土瓜灣區內嘅天際線,而舊式樓宇亦一度被收購重建,意味時代巨輪繼續急速轉動。要為舊區留倩影,就要趁土瓜灣未有屏風樓前去睇吓風景兼影吓相啦!

(3)東何文田配水庫遊樂場

由紅燈山落山,可以步行約10至20mins,可到達東何文田配水庫遊樂場,中途會經過常樂街花園,視乎行山路捷徑定常樂街馬路。第三個配水庫遊樂場中央同樣有一塊大草地,中央大草地曾經可以睇棒球練習,旁邊亦可作緩跑徑,圍繞而走,既可俯視土瓜灣至何文田一帶景色,更可望維港海景。而東何文田配水庫容量係全港最大,有逾15萬立方米,大概有兩大個足球場之多。而遊樂場涼亭入口旁邊亦有東何文田休憩處,內有遊樂區,亦有約200米長嘅緩跑徑、康體設施,不過呢邊景觀比較狹窄,只能穿過屏風樓中間望維港海景。

(4)京士柏上配水庫遊樂場

最後一個配水庫遊樂場同上述3個稍有分隔,但亦係依山而建,為最接近何文田市中心嘅配水庫遊樂場。京士柏上配水庫遊樂場地方偌大,位處高地,可望九龍半山靚景,亦可俯視九龍半島,尤如區內嘅空中花園,同上述配水庫一樣擁有舊式配水庫倉門,亦可以係文青打卡位之一。只要穿過忠義街花園,即可到達京士柏上配水庫遊樂場,場內有康體設施,亦有大型休憩空間,最近更於大草地新增咗兩個硬地足球場,西面可望愛民邨一帶市景。




E.A.Tips :

(1) 巴士路線101, 107, 170, 28M, 8 都會經過土瓜灣,巴士路線11X,14,15,15X, 28,93K,608,796X 則可於天光道落車,而巴士路線5,5A,5P,11,26 可於馬頭圍道落車,乘搭小巴27M,28MS可於靠背壟道落車,步行約5分鐘可到達馬頭圍配水庫遊樂場;而若由京士柏配水庫遊樂場為起點,可乘搭小巴8,8P,8S,28MS、或巴士路線7B,8,17, 41,45,109 於聖三一堂中學落車,經忠孝街休憩處,步行約5分鐘亦可到達京士柏配水庫遊樂場。

(2)謹記愛護環境,垃圾要扔入垃圾桶,或自己垃圾自己帶走。

(3) 部份位置靠近住宅區,記得保持安靜,勿喧嘩。

(4) 烈日當空下,做運動時謹記小心中暑。


馬頭圍配水庫遊樂場

採石山常和街2A號
07:00-18:00
2762 7837

何文田上配水庫遊樂場

採石山
24hours

東何文田配水庫遊樂場

老龍坑佛光街
07:30-18:30
2760 0782

京士柏上配水庫遊樂場

十二號山忠孝街
24hours
2330 1708

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!