2021-03-02

Burger Joys副線! Lucky Smash 手打牛漢堡外賣店登陸荃灣

Burger Joys副線 Lucky Smash 荃灣


最近荃灣有一間全新漢堡店,紅噹噹嘅招牌非常搶眼,以Lucky Smash命名,只係賣3款漢堡包,荃灣都算係甲級美食區之一,要突圍並非易事。呢間Burger店原來都係知名漢堡包店Burger Joys副線,難怪人流絡繹不絕,至於Burger真實水準又如何?

呢間Burger店位於荃灣享和街,店面以紅、白為主調,牆上掛滿漢堡包海報,菜單上只係賣3款外賣漢堡包,包括雙層芝士牛肉漢堡 $98、芝士牛肉漢堡 $78、牛肉漢堡 $68,款式簡單,每款套餐都配有鮮炸薯條、罐裝汽水,似足麥記連鎖店。價錢上雖然比麥記貴一倍,但質量上就有天壤之别,burger即叫即砌,並非快餐店般預先整好,burger到手一刻熱辣辣,攞到返屋企仍然暖笠笠,係拍拖兩個人嘅外賣選擇。

先以最平價嘅牛肉漢堡為例,牛肉非普通質素,據稱係新西蘭安格斯手打牛肉,難怪漢堡扒軟嫩易入口,牛味濃郁,有肉汁之餘唔太油膩,脂肪比例恰當。牛肉幾大塊,邊緣壓得較薄,略有鬆散,中間比較結實,不過就可以鎖住肉汁。留意到煎漢堡扒時中途會加入芥末醬、芝士、鹽等配料,漢堡扒稍有鹹香,質感略有濕潤,唔太乾柴。不過,小編覺得牛肉並非一定要貴同靚,煎漢堡扒時如果識利用牛骨髓、牛脂肪,一樣可以達到香氣四溢效果。

而芝士迷就一定係揀芝士牛肉,甚至雙層芝士牛肉,加入芝士後,Burger嘅邪惡感會即時上升!每舊麵包表面都塗上牛油,底部有微微煎過,使邊緣輕脆,內餡再塗有自製沙律醬,入口酸甜,加上蕃茄片,增加食慾之餘,令漢堡扒嘅油膩感降低。以外賣嚟講,Lucky Smash似乎麵包質量比嘉寶漢堡更出色,上次小編買嘉寶漢堡外賣,味道雖然比較好,但麵包表面已經皺起,甚至塌陷。今次麵包竟然仍然令身,而且感覺飽滿,雖然整體味道未及嘉寶漢堡,但外賣反而有驚喜,只係芝士部份稍有溶化。

至於薯條則同麥記嘅差唔多,分別在於鹽份較少,而且份量多幾倍!屬冷凍幼身薯條,同樣即叫即炸,幾脆口,但採用紙盒密封包裝,令薯條好快變得軟身,增加水份,不過部份薯條頂部留有薯皮,稍有咬口。


E.A.Tips﹕

(1)只收現金,無電子支付。
(2)小店只有外賣,並無堂食提供。
(3)加$10可以叫埋一款熱狗。
(4)建議薯條要翻焗,既可保溫,保持微脆感,亦可收乾水份。
(5)享和街有大量停車位,揸車去可以即時喺車廂內進食。


Lucky Smash

荃灣享和街43-59號都城大樓地舖

Please Like & Follow & Subscribe /
歡迎讚好、追蹤、訂閱