The Planet
Cafe 咖啡店,  兩個人醫吓肚,  和你Taste

被美孚新邨包圍 星球主題下嘆下午茶



提到美孚,近來最出名係去宴會廳跳舞,不過要對自己健康負責就當然係去返良心小店啦!區內基本被美孚新邨包圍,食肆數目唔多,以下呢間餐廳喺今年中先開業,裝潢以星球為主,木系為副,網民評價好壞參半,真實嘅食物質素又點呢?

門口有一個星球造型裝飾,室內燈光唔算多,貫徹主題The Planet,有午餐、晚餐,而下午茶就較相宜。

漢堡扒牛角包配薯條 $65 薯條炸得夠金黃香口。但牛角包、迷你漢堡扒都滿滿油膩感,令沙律菜放旁邊吸收晒漢堡扒等滲透出嚟嘅油份。牛角包有微微酥感,只係油比較多,而且偏涼,烘得唔夠,並非熱辣辣上枱,而漢堡扒亦多油份。整體感覺一般。

雞翼芝士黑松露薯條 $55 入口脆身,但亦走唔甩比較重油份,而且口中有陣陣油膱味滲出。不過蘸埋小碟中嘅沙律醬汁尚可中和。至於薯條,仍然金黃香口,唯黑松露香味偏少,不過都係油份較多。

另加日式豬骨湯螺絲粉 $8,湯底唔算難食,但入口奇怪,零豬骨味,螺絲粉只有火腿有微鹹味,不過以套餐加$8價錢都可接受。而另加Cup Cake $28,其中一款係檸檬撻,可以接受,係Mousse形式內餡,檸檬味適中,撻皮濕潤。

凍檸茶茶香味稍輕,必須篤檸檬篤到爛先夠檸檬澀味。熱咖啡夠香,表面有輕微鮮奶泡沫感,但奶泡打得較差,明顯唔夠綿密、順滑,略欠creamy感,大概俾咗Cappuccino。

E.A.Tips﹕

(1)附近Cafe 82午餐時間只到14:30,The Planet就有下午茶,食物質素係其次,最重要係幫襯同路人。

(2)位置喺荔枝角公園對面,非常方便。
(3)最終兩個人去,人均要大概$80,價錢的確可圈可點,拍拖食有啲唔抵食。

The Planet

美孚美孚新邨第五期蘭秀道2號地下N20 6A-B號舖
07:30 – 22:00
9581 8099

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!