[sig_post_pv label=””] 個人瀏覽過
錦田有唔少圍村，兩個人行遠少少會發現更多神秘小村落，沿村落小路走，有幾分似日本鄉郊地方，無得去旅行就當感受少少外國風啦，都可以係一個拍拖散步點。
今次去到隱藏於錦田逢吉鄉嘅上將府第，為客家村落，毗連模範村、華盛村、榮基村，記者於逢吉鄉上將府門外遇到沈門第4代嘅沈老先生，得知逢吉鄉背景已有逾百年歷史，絕對歷史悠久。
沿華盛村路牌進入逢吉鄉，會經過供奉天后娘娘嘅逢吉鄉花炮會址、四村互助會，重有逢吉茶樓，門口有村民話茶樓只係開朝早時段，要9點前先有得食，而逢吉茶樓為典型舊式瓦頂茶樓。
沈老先生為第4代傳人，他表示曾經於加拿大溫哥華居住，做銀行財務控制主任（Controller），讀完書、做完酒店生意，退休返嚟逢吉鄉居住，但仔女仍居於溫哥華。其祖父為上將（編按﹕上將指軍人當中最高級嘅職位），佢甚至提到英華畢業生嘅堂哥為核子工程師，而其子則於當地做警務署署長，身為門將之後，同樣位高權重，關係似乎有幾分微妙。沈老先生提到每逢重陽等拜山時節，都有唔少人返逢吉鄉，而佢表示每兩年會返加拿大溫哥華一次，不過疫情期間就未有返去。沈老先生推介上山去行吓妙覺寺，添香油可以食一餐素菜，唔少有錢人都會去行吓，而且風景不俗。
翻查資料，逢吉鄉內嘅上將府第於2009年被評為二級歷史建築，沈氏家祠來自因軍閥混戰來港避難嘅廣西桂系軍閥將領沈鴻英，至今約90年，仍然可以居住，而且非常堅固。沈鴻英曾喺袁世凱死後經歷軍閥割據年代，獲北洋政府頒授協威將軍陸軍上將榮銜，後來向孫中山投誠，加入辛亥革命。最終沈鴻英見沙埔村一帶風景秀麗，向錦田鄧氏購入此地興建沈氏大宅，與家中一妻六妾、九子十女同住，命名為上將府，而居住土地則起名為逢吉鄉，因為逢吉鄉本身有逢凶化吉嘅意思。
行入古屋前，會見到高聳圍牆，正對上將府係一個大操場，唔少居民都會用作曬穀或休息地，旁邊有沈氏家祠、協威樓，家室同祠堂相連，正門刻有鎮南堂字跡，通通以青磚舖砌。行到側邊，會發現兩棟樓之間有小天橋連接，整個設計幾中西合璧。據稱，之所以命名為協威樓，係因為眷戀協威將軍頭銜，兼想向子孫宣揚以往功績。沈鴻英於30年代曾為元朗博愛醫院主席。
協威樓為兩層設計，窗框呈綠色，牆身日漸破落，屋頂為金字頂，有天井，而上將府就掛起牌匾，上面僅依稀睇到有四隻字字跡﹕宣威馳譽，據悉係當年黎元洪寫俾沈鴻英。目前大宅少有後人居住，大部份沈氏後人已經移居美國，整個逢吉鄉其實只得10幾人居住。
出返大路向右行，沿路會見到好多路牌，可以去到妙覺寺、農地、露營地、war game場，甚至泰國菜餐廳，中段會經過逢吉鄉籃球場、林村郊野公園一個入口處。沿水尾村方向繼續行，新潭路中段分岔小路會見到疑為舊養豬場，亦有破舊小屋，不過行到盡頭即見到有地盤野狗，所以未有前進。
折返原路繼續前行，會見到Park Nature營地指示牌，門口先會見到一間名為泰Cow嘅餐廳，主打泰國菜，戶外空間睇落幾Chill。向內繼續行，會見到一個露營地，據悉以星空露營車為主打，露營車以太空艙設計，俾人可以入露營車玩Glamping，可以享受大自然之餘，似足酒店設施，唔需要好似平時咁重裝出發露營，只需帶備少量個人用品如毛巾，比較適合懶人玩露營。
前面路段可以見到有The Farm休閒物語士多、小狗農莊，亦可以BBQ，繼續向前行，於小路見到一大群貌似黑狗嘅小黑羊，疑似由牧羊人帶領，甚有規律，估唔到本地都有羊群洶湧而出，實在令記者意想不到！
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
延伸閱讀﹕錦田隱世正宗泰國菜 平價濕炒河粉極惹味
延伸閱讀﹕錦田百年樹屋被颱風吹冧 平湖雙池塘天空之鏡日落勝地
E.A.Tips﹕
（1）逢吉鄉仍有少數後人居住，切勿擅自闖入，除非遇上屋主容許參觀。
（2）謹記保持安靜，唔好騷擾村內居民。
（3）由錦田市中心乘搭的士到逢吉鄉，車程約10分鐘，車費約$45，亦可從元朗乘搭綠色小巴603號或巴士76K，到達村口落車。
（4）村落不時有狗出沒，行入小路如見野狗就唔好再向前行啦，行到農場前一條分岔路會通往地盤，隨時殺出隻野狗，不宜冒險。
（5）Park Nature露營地電話為9441 6025，每晚至少$2399，kkday人均$299，入營需交$1000按金，而租爐租廚具、燒烤晚餐另計，詳情請參閱Park Nature Facebook。外面可免費泊車，另可乘搭小巴到錦田平湖、樹屋附近落車，腳程約5至10mins。
（6）小黑羊大概於下晝16:30出現，睇唔睇到就要靠運氣啦。
逢吉鄉
元朗錦田西北部 
24hours
在〈驚現小黑羊！ 錦田古村逢吉鄉有段故 鄉郊小路滿佈農莊露營地〉中有 2 則留言
留言功能已關閉。