2021-01-27

油飯椰味濃 小食夠醒胃 海南雞飯配零味精湯水啱晒打工仔

可可豬海南雞專門店 cocopig hainanese chicken


疫情一緩和,又多咗食店開張,要突圍而出真係要諗諗計,最近炮台山區有一間新開業嘅海南雞飯專門店,以椰香雞飯、豬手飯為主打,同坊間雞飯有啲唔同,滲透椰子香味,有啲似椰子煲雞,加配咗一杯無味精嘅食療湯水,覺得會好啱忙碌嘅打工仔,兩個人食亦唔算太貴,屬於經濟型。翻查資料,前身叫椰粉湯紅,紅磡店似乎係首店,曾指每日賣足100盒雞飯,而且做晒宣傳功夫,而炮台山店係一間新開業嘅分店,去唔到旅行就當去咗新加坡算。

首選嘅係招牌貨特色椰香海南雞飯 $76,海南雞同油飯都有好重椰子香味,海南雞肉份量唔太多,大概6至7件,大小見仁見智,比較適合女士食用。平時見雞同飯比例差太遠都會負評,但今次係油飯比雞更有水準,油飯係泰國米,飯量唔少,乾爽而分明,有咬口,除咗一般雞油香,椰漿係點睛之筆,同普遍油飯的確有分別。但屬雞髀肉,肉質嫩滑,雞皮金黃,幼薄有油香,皮下脂肪唔多,肥瘦適中,略有雞味但唔太油膩,雞肉同油飯一樣滲透出啖啖椰子香味,大概加入椰子煮過。蘿蔔絲、車厘茄等伴菜嘅酸甜味幾醒胃,而醬汁鹹中帶小辣微微酸甜味,有少少蒜味,幾可口。

椰香雞飯比較清香,想食重味少少就叫埋多種層次嘅香辣口水雞飯 $74,雞肉有雞髀肉同雞翼,前者亦係啖啖肉,入口滑嫩,醬汁辛辣度適中,醬汁香辣入味,睇落色澤紅噹噹,幾多辣椒,有濃味感覺,但唔算太辣,幾刺激食慾。口水雞比清香嘅椰香海南雞飯較惹味,口水雞比海南雞飯多油,適合配白飯。

叫飯加$15試吓小食養生秋葵,平時好少有配合豉油調味,通常就咁食,秋葵切成細塊,入口爽脆,只係簡單配甜豉油,幾開胃,反而適合配口水雞,可以解解辣。加$18試另一款小食滷水牛𦟌,屬冷盤,份量唔多,配有滷水汁,幾醒胃,牛𦟌比較薄切,但有肉味,望落通透,入口唔韌,軟腍入味。

另加$18可叫埋食療拿湯杯,查一查原來每個禮拜都有唔同款式嘅湯水,今次係青紅蘿蔔蓮藕湯,聲稱可養血養胃,生津健脾,下氣化滯,補肝明目。湯水入口鮮甜,唔會好鹹,感覺好家庭式,飲完唔口渴,湯水無味精比較難得,幾滋潤,但一杯份量唔太多,比較適合無時間煲湯嘅打工仔。加$13再試埋樽裝嘅金羅漢果養生茶,內有羅漢果、菊花、杞子、果皮等,入口清甜解渴,有天然感覺,好過飲汽水,只係渣比較多,隔渣飲比較麻煩。


E.A.Tips﹕

(1)以外賣為主,喺門口櫃台俾錢叫餐就得,外賣大概等5至10mins就有;有少量堂食座位,但座位唔多,拍拖去食都可以容納到,多人就唔得啦。
(2)可以喺外賣App預先落單,然後到店自取,會更慳時間。
(3)雞飯可以揀大細,標準或增量版,我哋叫嘅係標準版。


可可豬海南雞專門店

北角炮台山麥連街1A號寶榮大廈地下I號舖
星期一至六 11:00 – 21:00;星期日全日休息
2242 6388

Please Like & Follow & Subscribe /
歡迎讚好、追蹤、訂閱