靠近氣象站 300級樓梯直上油麻地空中花園

市區人多車多，想搵個舒適地方都唔容易，油麻地更加係車水馬龍，要向上走先可以暫時抖一抖。毗鄰油麻地消防局嘅油麻地配水庫休憩花園，位處京士柏道，可從兩個入口進入，內有大草地同緩跑徑，可以兩個人輕鬆散步或跑步，甚至拍拖放風箏。

香港有好多配水庫都配有遊樂場或公園，開放俾公眾使用，大多配水庫遊樂場都係位處該區稍高地帶，既可呼吸新鮮空氣，亦可從高空觀景，野餐、影相、放空都好適合，更加可以當行山郁動吓。

油麻地配水庫休憩花園靠近京士柏遊樂場，上面有廣闊草地，並且有緩跑徑圍繞，有幾分似何文田配水庫遊樂場或樂富配水庫遊樂場。入口前有一個閘口，一邊係氣象館，為天文台氣象站，平時聽到「京士柏錄得的平均紫外線指數」指嘅就係呢度。

相信呢處係該區一個神秘花園，一般需要咁行樓梯上嘅地方都係比較少人，因為並非容易到達，可算係油麻地區內一個空中花園。

E.A.Tips﹕

（1）可以由彌敦道轉入眾坊街，經京士柏休憩公園小路上，一邊小路會去到天文台氣象站，沿路去京士柏公園方向，可於對面抽水站旁邊樓梯直上；另一個入口可以由油麻地消防局直送一條天梯，斜度頗高，大概行300幾級樓梯就會到達油麻地配水庫休憩花園，腳程約15分鐘；重有一個入口就係伊利沙伯醫院方向經京士柏道上山，同樣有小路可達油麻地配水庫休憩花園。
（2）油麻地配水庫休憩花園無洗手間，需要落返京士柏公園先有。

油麻地配水庫休憩花園

油麻地京士柏道
24hours

---