by Miss A同閨蜜兩個人去完圖書館之後搵嘢食（差啲又打錯中央圖書館，係九龍圖書館）。行吓行吓見到呢間Are U Labeler嘅Cafe做晒Halloween裝飾，我哋停低咗睇吓食咩，覺得okay而呢個鐘數無乜人就入咗去食。
裝潢本身都幾有心思，又無咩人，好靜，無論係拍拖定鍾意去啲cafe打卡嘅朋友會好適合。
冬蔭功海鮮意大利飯 $98
開頭諗以為係湯飯嗰類，原來佢係冬蔭功整嘅醬汁撈飯，味道的確係冬蔭功味嚟，食落好香口。不過無咩辣味，唔食辣嘅朋友都可以食，上面舖滿芝士，撈埋之後芝士溶落啲汁度，芝士味同冬蔭公味喺舌頭交織。仲有海鮮味，以為唔會好多海鮮，原來每樣都有2隻，有蝦、青口同好多蜆肉，醬汁有少少杰身同黏口，飯粒被醬汁包裹，粒粒分明而且唔會太硬。
冬蔭功海鮮意大利飯
燒春雞半隻配薯菜 $148
真係有雞髀雞胸雞翼半隻雞架，雞燒得好香好惹味，美中不足只係有少少位燒焦， 大部分都燒得金黃色好靚。不過Miss A覺得薯條比雞更好食，薯條每條都金黃色脆卜卜，外脆內軟蘸茄汁好食過M記薯粉整嘅薯條好多，無一條係炸燶架，而且唔會太鹹，味道啱啱好。
燒春雞半隻配薯菜 燒春雞半隻配薯菜
Rose Lychee Soda $36
玫瑰荔枝梳打味道偏甜 ，上面舖滿玫瑰花花瓣，下面有2粒荔枝，建議攪勻先飲，味道會平均啲。
Are U Labeler
地址﹕何文田梭椏道25A地舖
營業時間﹕08:00 – 22:00
電話﹕3188 5582
Please Like & Follow & Subscribe /
歡迎讚好、追蹤、訂閱
