2020-12-06

紅磡古早味蛋糕店千變萬化 每次3款口味同時出爐

紅磡阿里山


近來古早味蛋糕愈開愈多,似乎好多間古早味蛋糕店都受到港人歡迎,超有人氣,要食晒全港古早味蛋糕有困難,眼見古早風氣忽然大熱,今次搵紅磡呢間新開嘅台灣古早味蛋糕店試吓,透明度好高,玻璃後係製作地方,中、英文Menu都有,價錢偏貴,但口味眾多,大概有12款口味,每次出爐會同時有3款唔同口味,靠百變嘅口味大概會吸引到鍾意嚐鮮嘅香港人。

位處紅磡嘅阿里山開業僅3個月,以台灣古早味蛋糕為招徠,蛋糕師傅表示由台灣遠道而來,望可請多啲香港年輕人幫手。從大門口玻璃前可清晰觀察製作過程,遇上蛋糕每日新鮮出爐時可聞到香噴噴蛋糕香味,每盒價錢介乎$70至$100,視乎揀咩口味,兩個人去都可以試到2款口味,但最好係同多個朋友開心Share。

3款當中最原始最Origin就係阿里山原味道 $70,真係古早味蛋糕,原味蛋糕最簡單,會更睇蛋糕質感,蛋糕有濃濃蛋香味,香滑軟熟,軟綿綿之餘亦略帶濕潤,唔會太乾。大概係用植物油,比牛油蛋糕更有原始味,有幾分懷舊感,因為似以前港式嘅紙包蛋糕!

日本柚子蜂蜜 $95 係3款當中最有趣,不單質感鬆軟,入口更有粒粒柚子皮,店方稱係日本柚子皮,餡料都好豐富,蛋糕有幾分似柚子蜜,混合柚子嘅微苦、微甜,加上官方稱採用台灣龍眼蜜,入口帶有香甜味,啖啖清香,唔會有死甜味,拍拖情侶食更Sweet。

朱古力迷必食嘅係橙香朱古力 $100,熱辣辣時朱古力內餡都暖笠笠,有輕微流心朱古力漿感覺,凍咗就更感覺到似曲奇碎嘅似朱古力粒粒,入口同樣微苦、微甜,朱古力味唔算太濃,只係輕微香醇感,唔甜膩,表面質感比上述2款有少少實淨,而蛋糕內裏都算係軟心。

E.A.Tips﹕

(1)可放室溫1日,多過1日就要放入雪櫃內,不過都係盡快食用啦,隔日食無咩大分別,視乎雪櫃有無雪味。
(2)建議搵3個朋友一齊買,每人買1盒,然後Share,每人每盒可食3份1,咁就可以1個價錢食到3款口味啦!
(3)紙盒上係可食用顏料,大概怕客人掂完蛋糕又掂紙盒啩。紙盒同時可透氣,唔會令蛋糕淋晒。

延伸閱讀﹕黃埔至尖沙嘴海旁驚喜影相位 美人蕉花海打卡

阿里山

紅磡蕪湖街83號逸酒店地下5A號舖
12:00 – 21:00
2332 3118

Please Like & Follow & Subscribe /
歡迎讚好、追蹤、訂閱

       

One thought on “紅磡古早味蛋糕店千變萬化 每次3款口味同時出爐

Comments are closed.