2020-09-23
MOO Beef Cafe 將軍澳必食濃湯牛角包 激厚安格斯西冷牛三文治

將軍澳必食濃湯牛角包 激厚安格斯西冷牛三文治



    由於Miss A喺將軍澳返工,所以喺將軍澳嘅食店好多都試過,呢間MOO Beef Cafe喺將中最尾好入嘅位置,之前竟然無食過,今次同Mr E兩個人嚟試一試,原來都幾出乎意料之外。

    我哋今次2個人食叫多咗少少嘢,食到好飽,人均都唔使兩舊水,拍拖食都適合。

    牛角包牛尾 $62
    基本上係牛角包同牛尾濃湯餡,切開牛角包,切成一粒粒然後將牛尾濃湯餡料釀入牛角包裏面,牛角包鬆脆,個包亦鬆軟,味道偏淡,配搭內裏軟嫩嘅牛尾湯餡,形成強烈對比。牛尾肉質軟腍之餘,充份吸收變成醬汁嘅濃湯,咬下口表皮薄脆,內餡軟綿綿,醬汁香濃,呢個配搭設計勁新鮮,絕對要加分。

    安格斯西冷牛方塊三文治 $128
    配洋蔥蛋黃醬 一碟有4件牛肉三文治同薯條沙律,不過薯條偏鹹,未必個個會鍾意。而方塊三文治就係三文治入面夾住安格斯西冷牛肉,牛肉約5成熟,而出面係脆炸過,應該話係吉列牛嚟,所以食落特別香口,好鬆脆!4件每一件都好厚,最難得係4件個size都差唔多,麵包烘過,多士嚟,所以表皮輕脆。牛肉同三文治厚度係成隻手指公咁厚,可以一啖咬落去,牛肉仲有啲肉汁,吉列牛偏油膩是常識吧?所以配三文治就好好,麵包減低吉列牛肉帶出嘅油膩感。

    油封鴨忌廉扁意粉 配溫泉蛋$88 配沙律+餐湯+飲品(下面一杯$42可減$18)
    食之前食個沙律清清哋,再飲碗雜菜湯暖暖胃先。雜菜湯好濃,好足料,湯質感唔係creamy,反而真係湯水嚟,蕃茄味夠濃,特別好味。
    主菜油封鴨向來係法國菜嚟,今次試一試味道點先,將溫泉蛋同意粉攪勻,使每條意粉都沾有蛋汁,配上蛋汁味道會更濃郁。鴨肉同意粉炒勻上碟,份量都唔少,肉絲唔鞋口,好味好抵食,撈完蛋汁之後變得杰,意粉掛晒蛋汁,雖然食到底好滯,不過味道上好高質。

    芒果甘筍乳酪奶昔$42
    芒果香甜味配甘筍清甜味,加入滑溜奶昔,質感好幼滑,打得好勻循,無一條條或一粒粒嘅絲。不過奶味比芒果甘筍重,鍾意芒果奶會鍾意。
    營養奶昔 含蘋果、牛油果、香蕉 $42
    極度推介!本身Miss A好鍾意食avocado,今次奶昔加埋avocado,質感滑上加滑!avocado本來都係creamy狀,偏滑,加埋幼滑嘅奶昔就更滑。仲有清甜嘅蘋果同香甜嘅香蕉,令奶昔唔會太淡,味道好配合,適合鍾意清淡嘅人。

    是日精選士多啤梨奶凍 套餐+$12
    我哋食嗰日係strawberry奶凍,Miss A不嬲都係strawberry迷。將1-2粒strawberry切片伴碟幾靚,喺香甜奶凍上面擠下strawberry醬,酸甜嘅strawberry解咗奶凍嘅甜味,整體食落無咁膩。

    MOO Beef Cafe
    地址﹕將軍澳唐德街9號將軍澳中心1樓137C號舖
    營業時間﹕11:30 – 22:00
    電話﹕2332 1236

    最新消息:

    根據MOO BEEF Cafe官方FACEBOOK公佈, 由於疫情關係, 該餐廳已於17/2開始暫停營業,直至另行通知。

    詳情請留意MOO BEEF Cafe官方FACEBOOK

    Please Like & Follow & Subscribe /
    歡迎讚好、追蹤、訂閱