泰金香泰菜
兩個人醫吓肚

鰂魚涌街角新餐廳 菜式正宗$58泰抵食



疫情未停止,香港人仍然未有得去旅行,要止止旅行癮就唯有搵吓啲炮製正宗國外菜式嘅餐廳,今次小編見到鰂魚涌呢間新開張嘅泰國餐廳,有一秒穿越泰國嘅感覺。

室內外裝潢似足泰國當地餐廳,有地道特色,大廚員工都似係泰藉,從視點觀察,似正宗泰國餐廳。餐牌每款都只係50零蚊,屬平價美食,而且套餐包飲品,拍拖兩個人去食價錢亦合理。

即管叫一碟只有正宗泰國餐廳先會做得好嘅香菜肉碎太陽蛋飯 $58,免治肉碎炒得香口,加上白飯同表面半生熟嘅煎蛋,惹味非常。肉碎調味恰好,鹹中帶微甜,只係輕微辣度,加入九層塔味道更香,香辣味用嚟撈飯一流!

另外叫多碗喇沙湯麵 $58,無檬粉就唯有配金邊粉啦。喇沙配料豐富,有蝦肉、魚片、豆卜、蛋等,微量炸蒜、蔥粒點綴下顏色均勻。湯底有喇沙味,微甜,只係略嫌唔夠濃稠,金邊粉始終無檬粉等幼身麵條咁適合配喇沙。

其中一款小食係泰式鳳爪 $18,鳳爪無骨,味道偏辛辣,酸甜味加上香辣味非常開胃,適合作前菜。而飲品有4款,3款係泰式飲品,包括泰式青檸茶、龍眼冰,青檸茶入口舒爽,飽餐後好解膩,龍眼冰入口微甜,香甜味可解辣,亦適合用餐後飲用。

E.A.Tips﹕從叮叮車路英皇道轉入芬尼街,店舖位置之前係餃餃餃子。

泰金香泰菜

地址﹕鰂魚涌芬尼街2D號僑英大廈地下4-5號舖
營業時間﹕11:00 – 22:00
電話﹕9690 0519

延伸閱讀﹕鰂魚涌足料鮮蝦濃湯麵 湯底濃郁麵條掛湯【有片】

延伸閱讀﹕鰂魚涌公園綻放紅花風鈴木 3月紫紅風暴超壯觀

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!