2020-09-21
木蘭館

石硤尾微舖人流絡繹不絕 木蘭館$49賣大碗鰻魚飯



要喺人流稀少嘅地方突圍而出並非而事,位處石硤尾白田購物中心corner位之一嘅木蘭館,最特別之處係大件夾抵食,大大碗鰻魚飯50蚊有找。木蘭館舖位屬微舖,不過隔離都開咗少量座位可供堂食,大多數人都會叫外賣,加上特首唔俾堂食,外賣嘅人都一個接一個,未夠兩點,飲品最先售罄。

石硤尾以屋邨為主,但白田購物中心本來就係一個人跡罕至嘅街坊商場,多間食肆都只係微舖形式營業,靠嘅只係薄利多銷,而木蘭館竟然可以靠日式飯盒、炸物小食成為當中門庭若市嘅小店,即叫即製,質素可見一斑,絕對係港人平價飯盒選擇。

招牌之一係蒲燒鰻魚飯 $49,有普通版、厚身版同特厚版,價錢介乎$49至$89,即使普通版鰻魚飯都有大條鰻魚,價錢最經濟實惠。最平嘅鰻魚厚度中等,以火槍輕輕炙燒,表皮帶焦香兼有微脆感,火喉十足,魚肉肥厚,醬汁鹹中帶甜。每盒飯量充足,有大半碗飯,珍珠米表面灑有大量海苔粉,配料有微酸嘅醃蘿蔔、滑溜嘅玉子燒,唔會單調,好滿足。

小店內另一款招牌係特盛照燒牛肉飯 $69,同樣使用珍珠米,飯粒煙韌,亦灑有大量海苔粉,牛肉份量超多,女仔兩個人未必食得晒,拍拖去食就會適合啲。牛肉炒得幾香口,油脂滿滿,可以撈飯,不過相比鰻魚,牛肉肉質略粗糙,唔夠軟嫩,juicy感較輕。

木蘭館

地址﹕ 石硤尾偉智里1-3號白田購物中心地下5號舖
營業時間﹕
電話﹕ 6655 9907
地址﹕ 石硤尾偉智里1-3號白田購物中心地下5號舖
營業時間﹕
電話﹕ 6655 9907

Please Like & Follow & Subscribe /
歡迎讚好、追蹤、訂閱