2020-09-26

聯和墟$46越南河 暗藏超清甜蘿蔔粒



由流水響、皇后山返回聯和墟,發現聯和道有好幾間食店,小編兩個人食過日式拉麵、日式刺身丼,呢間係其中一間未試嘅餐廳,主打越南菜,不過剛好當日特首唔俾6點半後堂食,唯有買外賣,返去再加熱。

越式美食一般比日韓美食平價,想慳返多少通常都係揀東南亞菜,餐牌內大部份都可控制喺$50內,飲品加$10。餐廳門面到室內都好雅緻,簡單裝修有幾分越南風格,吧內有粗麻繩、燈泡、燈籠,拍拖食都唔失禮。

Pho係越南河,屬越南餐廳必食菜式之一,越式春卷湯河 $46 湯底清甜,唔算濃郁,只係啖啖簡單清香味,河粉滑溜爽口,最特別之處係湯底隱藏有兩舊超清甜嘅白蘿蔔,咬落無渣,軟淋淋入晒味,如果有多兩舊就爽啦。而網包春卷唔係即食就似乎無乜鬆脆感,反而配搭嘅微酸醬汁幾開胃。

香茅豬頸肉撈檬 $54 撈埋酸中帶甜嘅醬汁幾醒胃,配料幾多,有青瓜絲、紅蘿蔔絲、花生碎。檬粉幼細,唔會太碎,只係略乾,但同河粉一樣爽口。至於豬頸肉,最好先放入焗爐內加熱,可逼出油份,邊緣位更香口。海量豬頸肉本身有香茅醃製,微鹹,無燒焦,有肉味,但略乾身,部份切開幾韌。

香茅雞中翼$26/3隻係其中一款小食,脆炸雞翼同樣以香茅醃製,香口惹味,雞翼比豬頸肉嫩滑而有肉汁,無咁乾,比較可口。同一道理,最好先放人焗爐加熱先食。

越式美食必備飲品有薄荷葉青檸梳打青檸檬梳打 +$10杯,前者多咗一片又一片薄荷葉,入口更重薄荷、青檸清香味,而後者就比較微酸帶清甜,兩款都係開胃、解膩嘅選擇。

越瀧棧越南菜館

地址﹕粉嶺聯和墟聯和路3號富貴樓地舖
營業時間﹕星期一至六 11:00 – 21:00;星期日全日休息
電話﹕3480 9220

Please Like & Follow & Subscribe /
歡迎讚好、追蹤、訂閱