2020-12-06

熱石沾麵消失? 人氣店麵屋哲偷偷回歸 進駐荃灣驚安之殿堂Food Court

麵屋哲TETSU


沾麵專門店麵屋哲為日本人氣連鎖拉麵店,昔日以高質沾麵引得拉麵迷垂涎,つけめんTETSU就曾經登陸銅鑼灣,惜分店於2015年結業,至今全球有27間分店,今年4月原來偷偷進駐荃灣海之戀驚安之殿堂美食廣場,到底可唔可以保持水準呢?

沾麵係將麵同湯分開上,只需將粗麵放於濃郁熱湯內,沾一沾即可以食,沾麵屬拉麵一種。今次麵屋哲進駐Food Court,風格上有些微轉變,但拉麵迷就感覺沾麵實在大不如前。

麵屋哲最令人難忘嘅係當年沿用日本店方式有熱鐵石 (焼き石) 供應,沾汁凍咗可以再加,但新店估計可能受Food Court環境及安全條例所限無咗。今次同樣主打沾麵同豚骨拉麵,以豚骨、鰹魚乾等熬出濃郁湯底,夠晒惹味。

哲濃沾麵$78 即係魚介豚骨高湯沾麵,價錢尚且可以接受,麵條偏粗,軟硬度適中,質感尚算煙韌彈牙。而香港店放置配菜的方式是放於麵上而不跟日本店放於湯中,令沾汁感觀上比較單調,但對味道沒太大影響。至於沾汁入口較濃厚,令麵條掛湯,有魚香味,豚骨味的確濃烈,鹹度恰好,但整體仍然係比較單調,層次感一般。食完沾麵可以再加入柴魚清湯,將沾汁湯底飲完。

配料當中,叉燒夠香,大小適中,份量都算大方,不過小編曾經聽一位資深拉麵迷講過,採用獅子狗作配菜係對碗拉麵無自信嘅表現 (雖然日本店原本都有)。整體嚟講,沾麵係算達到標準,只係欠缺驚喜感。

E.A.Tips﹕

(1)「湯割」添加清湯係需要自助式去店面加,如果人流多時,一個人去食要添清湯就比較煩惱,隨時加完返去就無咗個位,所以兩個人拍拖去食都係比較適合。
(2)由於今次無咗熱石加熱沾汁,加上場地冷氣比較凍,所以建議要食快少少,避免攤到凍晒。

延伸閱讀﹕荃灣小店隱藏暗巷 3款正宗沾麵有驚喜

延伸閱讀﹕荃灣隱世壁畫村 光板田村七色階梯打卡

麵屋哲

地址﹕荃灣大河道100號海之戀商場2樓激安之殿堂美食廣場TW08號舖

Please Like & Follow & Subscribe /
歡迎讚好、追蹤、訂閱

       

One thought on “熱石沾麵消失? 人氣店麵屋哲偷偷回歸 進駐荃灣驚安之殿堂Food Court

Comments are closed.