2020-09-21
麵屋福

荃灣小店隱藏暗巷 3款正宗沾麵有驚喜



荃灣西工業大廈多多,要搵好嘢食要多花時間,小編今次跟住幾個拉麵迷好友嚟到呢間日式沾麵小店。小店位於工業區對面,靠近荃灣廣場,裝潢陳設以日式小店為藍本,店舖座位以沾麵店嚟講算唔少,可以容納20幾人,枱與枱之間亦夠闊落,算係坐得舒服。小店主打就係沾麵,全店只有三款沾麵選擇,由於一行四人,小編今次可以試哂三款,包括係魚介豚骨沾麵黑蒜油豚骨沾麵蕃茄紅油沾麵

魚介豚骨沾麵 $73 湯底唔算太黏稠,並非一點就沾滿麵條,以豬骨熬成嘅湯底,魚介味唔算太出眾,鮮味恰到好處,唔算太鹹。配料有芝麻、溏心蛋、筍、叉燒、蔥花等,味道更香濃,特別係味荀,入口唔似攞貨,似係自家製作,好夠鮮味同好入味,掛湯力十足。至於麵條就係粗麵,質感煙韌又彈牙,而溏心蛋亦入晒味,流心度高,好有水準。不過叉燒就比較一般。

黑蒜油豚骨沾麵 $83 味道相對較重口味,黑蒜香未入口已聞到好濃烈嘅味道,食落口更濃味,同樣有溏心蛋等基本配料。加$10可多蔥花,一碟足夠三至四人分享。

至於 蕃茄紅油沾麵 $88 更加係招牌之一,超受歡迎!蕃茄湯底嘅沾麵比較罕見,以超香濃嘅蕃茄湯底炮製,滿碗都係蕃茄蓉,好真材實料,唔單止有蔥花,仲有微辣感,入口清新,醒胃又惹味。不過,如果飲埋湯可能會覺得口渴,記得準備定杯水。

最後當然要加木魚湯飲埋個沾汁啦,不過因為份量都算多,太飽難以完勝整碗,不過真係好滿足。

e.a.tips
餐廳空間唔多,人齊先會安排入座。

交通﹕港鐵荃灣西站或搭巴士到荃灣西交通交匯處落車,腳程約10mins。

麵屋福

地址﹕ 荃灣享成街18號地舖
營業時間﹕ 11:30 – 15:30
18:00 – 21:30
電話﹕ 3590 3018
地址﹕ 荃灣享成街18號地舖
營業時間﹕ 11:30 – 15:30
18:00 – 21:30
電話﹕ 3590 3018

Please Like & Follow & Subscribe /
歡迎讚好、追蹤、訂閱