2020-12-06

$100樓下埋單! 旺角4間激抵石燒牛推介

旺角4間激抵石燒牛推介


想撐枱腳又唔想使咁多錢?今次推介旺角鬧市四間石燒牛扒,間間最平100蚊內有交易,石燒牛扒係利用熱石將一成熟嘅牛扒由客人自己煎到適當生熟度,一般五成至七成最軟嫩兼惹味,絕對係窮人拍拖之選!

(1)平民扒房@友蠔食

位處女人街,講到明叫平民扒房,餐廳當然以平價炮製最低200g嘅石燒牛啦,最平一份紐西蘭肉眼只係78蚊,套餐跟前菜、餐湯、白飯,餐湯入口creamy,好暖胃。美國牛板健 98蚊有200g,牛味唔太重,油脂亦唔多,但都好香口,入口啖啖肉唔黏牙,好軟嫩,容易嘴嚼。而薯菜都OK,薯蓉比菜突出,質感幼滑細綿,套餐加$12可以有菠蘿特飲,好清爽,味道唔太甜,適合解膩。

延伸閱讀﹕平價情人節大餐 女人街歎生蠔+石燒牛扒

(2)牛極

位置同樣喺女人街嘅牛極,亦都係方便之選,入門口自己喺自助售賣機點餐俾錢先入座,最平80蚊就有,以半自助形式為主,麵豉湯、沙律、白飯都可以自取,好有飽肚感,亦有好幾款醬汁任揀。牛肩扒 Top Blade Muscle 180g為80蚊,肉質軟腍,好嫩,肉汁幾豐腴,落少少調味料如BBQ香料、鹽、胡椒會更香,不過落鹽其實都夠味。牛味足夠,有油脂香,但有少少筋位,如果熱石唔夠熱力可以叫店只替換。

延伸閱讀﹕女人街半自助式石燒牛扒 200g都夠食

(3)磊犇

西洋菜南街絕對係旺角鬧市,磊犇(音﹕女彬)喺旺角近太子位置,亦以平價石燒牛為主打,200g牛肩肉同磊牛扒都係100蚊之內,其中後者去到300g亦只係100蚊。磊牛扒 300g都係$100,肉質軟嫩,唔需要特別嘴嚼都食到,但牛味唔太重,但蘸醬汁如照燒汁就好惹味。而餐廳同樣以半自助方式為主,可以自取飲品、白飯、前菜、湯,好有飽肚感,熱石最初好夠熱力,但要小心牛扒過熟。

延伸閱讀﹕熱力充足 太子100蚊內食石燒牛

(4)Cafe Paradise

另一間石燒牛扒係Cafe Paradise,位置基本同樣係旺角靠近太子位置,食石燒牛扒最平只係78蚊,人均唔使100蚊。美國頂級穀飼牛肩胛肉眼扒 200g只係78蚊,肉質唔韌,只係簡單用鹽同胡椒調味,唔花巧,牛味好濃,層次好豐富,將牛扒放上熱石上燒到五至七成熟,將油脂逼出,入口油脂香滿滿,難得係唔油膩。配菜薯角都好香脆可口,有兩款醬汁任蘸。重點係呢間係良心小店,要特別加分。

延伸閱讀﹕Cafe Paradise超抵石燒牛 100蚊樓下有交易

小編講吓嘢﹕

以熱石溫度嚟講,第四間熱力較好,而且較持久,食到尾都仲有熱力。第二間熱力稍遜,不過同第三間一樣都係半自助模式搭夠,白飯、湯、沙律、飲品等都可以自取,第三間則比較多100蚊以下嘅選擇,其他都只係得一樣係100蚊以下,只係室內設計有北上餐廳嘅感覺。而第一間最吸引嘅地方係有牛扒套餐又有生蠔,套餐其他嘢味道比較平均。不過,私心推介第四間,因為係最黃嘅一間。

Please Like & Follow & Subscribe /
歡迎讚好、追蹤、訂閱