2020-10-28
南朗山

港島南零成本森度遊 南朗山高空俯瞰海洋公園設施



南朗山位處香港南面,上山可以近距離觀望海洋公園同目前海洋公園施工嘅位置,工程之前輕鬆得到幾百億政府資助,但受疫情影響又要關門無收入,到底開返之後點繼續營運同下年會唔會再要納稅人資助就有待分曉。不過海洋公園近月推出森度遊,幾百蚊入場費呼籲大家入去行山同玩瑜珈,而事實上海洋公園靠近深水灣,亦圍繞南朗山而建,纜車會經過南朗山,拍拖上南朗山散吓步兼睇風景一流,最重要係行過隔離南朗山需要嘅係零成本入場費!

由黃竹坑作起點,經南朗山道沿路上山,天氣晴朗時風景已經優美,可望香港仔海峽、香港仔南避風塘、珍寶海鮮舫同鴨脷洲。直到行到往南朗山嘅樓梯,繼續向上山方向行走,最先會經過南朗山道休憩花園。再沿樓梯山徑直上,會見到南朗亭,沿途樓梯都係石屎路嚟,山徑舖設完善,可直上涼亭同觀景台,可以喺此處稍作休息。

不過,再繼續向前行走,會需要走泥路,樓梯陡斜之餘亦非石屎路,雖然注意安全。去到中途會到達其中一個打卡位,附近位置已經可以見到海洋公園遊樂設施。目前疫情期間海洋公園暫停開放,南朗山比海洋公園更熱鬧,有部份人上山喧鬧,寂靜山上顯得份外明顯,可以同之前去海洋公園玩過山車嘅人相比。

如果再繼續上山,可以沿路直上南朗山直升機坪同山頂,可以從最高點俯視附近海岸,如深水灣、熨波洲同海洋公園,藍天白雲下風景最佳,適合兩個人短遊。

上山前去熟食市場搵食,下晝3點左右已經見到好多收舖,最後搵咗呢間仲有得食,不過話有質素就絕對不敢苟同。泰式炒金邊粉 $52 配料尚算可接受,金邊粉黏住一舊舊,似一餅嘢,味道亦比較淡。泰式菠蘿炒飯 $52 比較容易入口,不過同茶記出品無咩分別,絕對唔能夠同好味兩個字掛鉤,係只求食飽肚嗰種質素。

E.A.Tips﹕

(1)E.A.路線﹕黃竹坑站➡️南朗山道熟食市場➡️經惠福道同新會商會陳白沙紀念中學➡️見新加坡國際學校轉右➡️沿路上南朗山道➡️經黃竹坑配水庫休憩花園➡️行10至15mins左邊會見到有樓梯到達南朗山山腳,整段路約需45mins➡️沿樓梯可直上南朗山,大概需時35mins➡️約1.5hr至2hr可上到山頂位置。

(2)天氣炎熱,小心中暑,上山當日氣溫甚高,Miss A未行到最高位置就有輕微中暑跡象,所以未有去到山頂最高點位置,休息後即沿路落山回程,故建議行山要睇天氣同量力而為,適可而止。

(3)沿路遮陰位置唔多,記得搽防曬同帶備充足飲料。

交通﹕
(1)地鐵黃竹坑站B出口,落樓梯即達熟食市場,沿南朗山道直上可達南朗山。
(2)城巴48號/107號都可到黃竹坑,小巴59號亦可。

南朗山

香港島黃竹坑
24hours

九記

黃竹坑南朗山道1號南朗山道熟食市場地舖
2814 9936

Please Like & Follow & Subscribe /
歡迎讚好、追蹤、訂閱